විෂමාචාර චෝදනා එල්ල වී සිටින තිලින ගමගේ මහේස්ත්‍රාත්වරයා සමග ළඟින්ම සබඳතා පැවැත්වූ හිටපු ජ්‍යේෂ්ඨ අමාත්‍යවරයකුගේ පුත්‍රයෙක් වන නීතීඥයකු සහ තවත් නමගිය නීතීඥයින් පිරිසක් පසුපස අධිකරණ කොමිසමේ විමර්ශකයින් ඉව අල්ලමින් සිටින බව ආරංචිවේ.

මේ අතරම තමන් තිලින ගමගේගේ නීතීඥයා වශයෙන් තැන තැන කියමින් ගිය අයෙක් මෙන්ම නමට ගමගේ කොටසක් ඇති අයෙකු ද සිටින බවත් රාවයක් පවතී.

ලංකාවේ ප්‍රසිද්ධ ව්‍යාපාරිකයින් දෙදෙනෙකු විසින් මෙම නීතීඥවරුන්ට එරෙහිව ලැබී ඇති පැමිණිලි දෙකක් ඉදිරිපත් කර ඇති අතර ඔවුන් පැමිණිලි කර ඇත්තේ මුදල් ලබාගැනීමේ සිද්ධි සම්බන්ධයෙන් බවත් ආරංචිමාර්ග වැඩිදුරටත් අනාවරණය කරයි.

නීතිවිරෝධී ලෙස අලි පැටවකු ළඟ තබාගැනීමේ සිද්ධියට අදාළව විෂමාචාර චෝදනා ඇතුළත් චෝදනා පත්‍රයක් තිලින ගමගේ මහතාට අධිකරණ සේවා කොමිෂන් සභාව විසින් පසුගිය ජුනි මාසයේදී යොමුකර තිබුණු අතර ඔහුව සේවයෙන් පහකිරීමට පසුගියදා අධිකරණ සේවා කොමිසම කටයුතු කර තිබිණ.

“ක්ලීන් ශ්‍රී ලංකා’’ (Clean Sri Lanka) ග්‍රාමීය සභාවේ සාමාජිකයන් දෙදෙනකු  මහජන ආරක්ෂක කමිටු පිහිටුවීමේදී කමිටු සාමාජිකත්වයට පත්කිරීම අනිවාර්ය කරමින් වැබ පොලිස්පති විසින් සියළු පොලිස් ස්ථානාධිපතිවරුන්ට චක්‍රලේඛයක් යවා ඇතැයි වාර්තා වේ.

මෙම කමිටුව සඳහා සාමාජිකයන් තෝරා පත්කර ගැනීමේදී වසමේ පිහිටුවා ඇති යෞවන හා ක්‍රීඩා සමාජ සාමාජිකයන්, වසමේ සමිති සමාගම් (පරිසර, මරණාධාර, කාන්තා, කුලී රථ) නියෝජිතයන්, විශ්‍රාමික පොලිස් නිලධාරින් හා විශ්‍රාමික ත්‍රිවිධ හමුදා සාමාජිකයන්, සේවයේ නියුතු හෝ විශ්‍රාමික රාජ්‍ය නිලධාරීන් තෝරා ගැනීම සම්ප්‍රදායික වශයෙන් මෙතෙක් කලක් භාවිතා කල ක්‍රමවේදයකි.

මහජන ආරක්ෂාව තහවුරු කිරීම පිණිස මහජන සහභාගිත්වය සක්‍රීය ලෙස ලබා ගැනීම සඳහා නව ප්‍රවේශයක් ලෙස ග්‍රාම නිලධාරී වසම් 14,022 ම ආවරණය වන පරිදි මහජන ආරක්ෂක කමිටු පිහිටුවා ඒ සඳහා පොලිස් නිලධරයන් අනුයුක්ත කළයුතු බවත්, ක්ලීන් ශ්‍රී ලංකා වැඩසටහන් අරමුණු සාක්ෂාත් කරගැනීම මූලික කරගනිමින් මෙම කමිටු මෙහෙයවීමට නියමිත බවත් අදාළ චක්‍රලේඛයේ දැක්වෙන බවද පැවසේ.

මූලාශ්‍රය – අරුණ

හිටපු නාවික හමුදාපති නිශාන්ත උළුගේතැන්න මහතාට චෝදනා එල්ල වී ඇති පොතුහැර ප්‍රදේශයේ තරුණයකු අතුරුදන් කිරීමේ සිදුවීමට අදාළව තවත් හිටපු නාවික හමුදාපතිවරුන් තිදෙනකුට අදාළව පරීක්ෂණ කටයුතු ආරම්භ කර ඇති බව සතිඅන්ත දේශය පුවත්පත වාර්තා කරයි.

එම පුවත්පත පෙන්වා දෙන පරිදි එම හිටපු නාවික හමුදාපතිවරුන් වන්නේ තිසර සමරසිංහ, සෝමතිලක දිසානායක සහ ජයනාත් කොළඹගේ යන මහත්වරුන්ය.මේ අය සම්බන්ධව නීතිය ක්‍රියාත්මක කිරීමට ආරක්ෂක අංශ තීරණය කර ඇතැයිද පුවත්පත අනාවරණය කරයි.

ශ්‍රී ලංකාවේ දැනට පවතින හා ඉදිරියේදී නිර්මාණය විය හැකි දේශපාලන ගැටලු සම්බන්ධයෙන් ඇමරිකානු බුද්ධි අංශ එරට තානාපති කාර්යාලය සතිපතා දැනුම්වත් කරන බවත්, ඒ අනුව ගෙවුණු සතියේදී යෞවන සමාජ ආශ්‍රිතඅර්බුදය තානාපති කාර්යාලයේ විශේෂ අවධානයට ලක්ව තිබෙන බවත් දේශපාලන ආරංචිමාර්ග පවසයි.

යෞවන සමාජ පිහිටුවීම, සාමාජික ලැයිස්තු සකස් කිරීම, තනතුරු වලට පත්කිරීම, තරුණ කටයුතු අමාත්‍යාංශය හා ජාතික තරුණ සේවා සභාවේ හැසිරීම ඇතුළු කරුණු කිහිපයක් ඇමරිකානු තානාපති කාර්යාලයේ නිරීක්ෂණයට ලක්ව ඇතැයි දැනගන්නට ලැබේ.

මේ අතර යෞවන සමාජ වලට දේශපාලනය ඈදාගෙන ඇතැයි තරුණ නියෝජිතයන් පිරිසක් හිටපු ජනාධිපති රනිල් වික්‍රමසිංහ මහතා පසුගිය සතියේ හමුවී පැමිණිලි කර තිබේ.

හිටපු පාර්ලිමේන්තු මන්ත්‍රීවරුන්ගේ විශ්‍රාම වැටුප අහෝසි කිරීමට රජය ගෙනයන ක්‍රියාමාර්ගය දැඩි ලෙස විවේචනය කරමින් ජනතා විමුක්ති පෙරමුණේ ජනාධිපතිධූර අපේක්ෂක එම පෙරමුණේ හිටපු පාර්ලිමේන්තු මන්ත්‍රී නන්දන ගුණතිලක සිය මුහුණු පොතේ සහටහනක් තබා ඇත.

එම සටහනේ දක්වා ඇති පරිදි ඔහු ජවිපේ 88/89 කැරැල්ලට සහභාගීව ආයුධ සන්නද්ධ ගරිල්ලා භටයෙකු ලෙස රජයට එරෙහි කුමන්ත්‍රණයට එක්ව ඇත්තේ විශ්ව විද්‍යාලයේ උපාධි අපේක්ෂකත්වය පවා අත්හැරීමෙනි. ජවිපේ හිටපු විධායක සභික නන්දන ගුණතිලක තැබූ සටහන මෙසේය.

ඊට පස්සෙ අපිට ගෙවපු පෙන්ශන් එකෙන් ” රට හදපල්ලා ” …!!!

ජනපති අනුර දිසානායකගේ ආරක්ෂක අංශයේ නිලධාරීන් කිහිප දෙනෙකු ඩියුටි ෆ්‍රීහි අලෙවිය පිණිස තබා තිබූ මත්පැන් බෝතල් 35කට අධික ප්‍රමාණයක් රැගෙන ගොස් තිබෙන බවට වාර්තා වේ. ඒ ජනාධිපතිවරයා මාලදිවයිනේ සංචාරය සදහා පිටත්ව යාමෙන් අනතුරුවය.

මේ සම්බන්ධයෙන් එම නිලධාරීන්ට විනය ක්‍රියාමාර්ග ගෙන ඇති අතර ඔවුනට ස්ථාන මාරුවීම් ද ලබා දී තිබේ.

මේ සම්බන්ධයෙන් විශේෂ විමර්ශනයක් ද ක්‍රියාත්මක වන බව වාර්තා වේ.

ලොව “වයස්ගතවම උපන් බිළිඳා” එක්සත් ජනපදයේ උපත ලබා ඇති බව විදෙස් මාධ්‍ය වාර්තා කරයි.

2025 ජූලි 26 වන දින ලෝකයට පිවිසි තැඩියස් ඩැනියෙල් පියර්ස් උපත ලැබුවේ වසර 30 කට වැඩි කාලයක් ශීතකර ගබඩා කර තිබූ කලලයකින් බව සඳහන් වෙයි

විදෙස් මාධ්‍ය වාර්තා කරන පරිදි 1994 දී මෙම කලලය නිර්මාණය කර ඇත.

කලලය 1994 සිට එක්සත් ජනපදයේ ඔහායෝ හි ජීවත් වන ලින්ඩ්සේ සහ ටිම් පියර්ස් විසින් දරුකමට හදා ගැනීමට ඡීව විද්‍යාත්මක මවගෙන් ලබා ගෙන ඇති අතර 2024 නොවැම්බර් මාසයේදී ලින්ඩ්සේගේ ගර්භාෂයට කලලය මාරු කර තිබෙයි.

දරුවාගේ ජීව විද්‍යාත්මක මව සහ පියා 1990 ගණන්වලදී IVF ප්‍රතිකාර ලබා ගෙන ඇති බව විදෙස් මාධ්‍ය වාර්තා කරයි.

ජාතික සත්වයා ලෙස “දඬු ලේනා’’ ප්‍රකාශයට පත් කිරීමට අදාළව මූලාශ්‍රයක් නොමැති බව ජනාධිපති ලේකම් කාර්යාලයයේ පසුගියදා පැවැති සාකච්ඡාවකදී අනාවරණයවී ඇතැයි වාර්තා වේ.

වන සත්ව හානි අවම කර ගැනීම සම්බන්ධව ජනාධිපති ලේකම් කාර්යාලයේ පසුගියදා පැවැති සාකච්ඡාවකදී “දඬු ලේනා’’ ජාතික සත්වයා ලෙස නම් කිරීමට අදාළ මූලාශ්‍ර සම්බන්ධව ද කතා බහට ලක්ව තිබේ.

“දඬු ලේනා“ ජාතික සත්වයා ලෙස ප්‍රකාශයට පත් කරනු ලැබුවේ කවුරුන් විසින්ද, ඊට අදාළ මූලාශ්‍ර මොනවා දැයි වනජීවි සංරක්ෂණ දෙපාර්තමේන්තුවෙන් විමසා ඇතත්, එම දෙපාර්තමේන්තුවේද ඊට අදාළ තොරතුරු නැතැයි තහවුරුවී ඇත.

වගාවට “දඬු ලේනා“ගෙන් දැඩි හානියක් සිදුවන නිසා එම සත්වයා ජාතික සත්වයා ලෙස ප්‍රකාශිත ලැයිස්තුවෙන් ඉවත් කිරීම සම්බන්ධවද මෙම සාකච්ඡාවේදී කතා බහට ලක්ව තිබේ. මේ අනුව, ඊට අදාළ කටයුතු වනජීවි සංරක්ෂණ දෙපාර්තමේන්තුවේ මූලිකත්වයෙන් සිදු කිරීමට නියමිතය.