ශ්‍රී ලංකා විදුලි බල සංශෝධන පනත් කෙටුම්පතට මහජන උපයෝගිතා කොමිසම හා නීතිපති දෙපාර්තමේන්තුවෙන් ඉදිරිපත්කරනු ලැබූ සංශෝධනද ඇතුලත් කරමින් විදුලි බල නව සංශෝධන පනත් කෙටුම්පත අද යටිතල පහසුකම් සහ උපාය මාර්ගික සංවර්ධනය පිළිබඳ ආංශික අධීක්ෂණ කාරක සභාව වෙත ඉදිරිපත් කිරීමට නියමිතයි.

පාර්ලිමේන්තු මහලේකම් කාර්යාලය සඳහන් කළේ අද දින කාරක සභාව වෙත භාෂ ත්‍රිත්වයෙන්ම සංශෝධිත පනත් කෙටුම්පත ඉදිරිපත් කොට කාරක සභාවේ අනුමැතිය ලභා ගැනීම සිදිකිරීමට අපේක්ෂා කරන බවයි.

ශ්‍රී ලංකාවේ දරුවන් යනු අනාගත චීන මිතුදමේ උරුමක්කරුවන් යැයි ශ්‍රී ලංකාවේ චීන තානාපති Qi Zhenhong මහතා පවසයි. ඔහු මේ බව පැවසුවේ අද (16) දින බත්තරමුල්ල අධ්‍යාපන අමාත්‍යංශයේදී පැවති උත්සවයක් අමතමින්ය.

2025 වර්ෂය සඳහා රුපියල් මිලියන 5,171 වටිනා පාසල් නිල ඇඳුම් රෙදි සඳහා අවශ්‍ය මුළු රෙදි ප්‍රමාණයම චීන රජයේ ප්‍රදානයක් ලෙස ලබා දී අවසන් බව නිල වශයෙන් දැනුම් දීමේ අවස්ථාව අග්‍රාමාත්‍ය හරිනි අමරසූරිය මෙනවියගේද සහභාගිත්වයෙන් පැවැති අතර එහිදී වැඩිදුරටත් අදහස් දැක්වූ ශ්‍රී ලංකාවේ චීන තානාපති Qi Zhenhong මහතා පවසා සිටියේ ශ්‍රී ලංකාව චීනයේ විශ්වාසවන්තම සහෝදරයා බවයි.

කොළඹ නගරාධිපති ව්‍රායි කැලි බල්තසාර් මහත්මිය, නගරාධිපති නිලනිවස වන සිරිනිවාස හි පෙර පාසැල් දරුවන් වෙනුවෙන් නව වැඩසටහන අද ආරම්භ කරන ලදි. කොළඹ මහනගර සභාව විසින් පවත්වාගෙන යනු ලබන පෙර පාසල් 12 හි දරුදැරියෝ මෙම අවස්ථාවට සහභාගී වූහ.

මෙම වැඩසටහනට පොත් කියවීම්, චිත්‍ර ඇඳීමේ ක්‍රියාකාරකම්, ගීත සහ ක්‍රීඩා වෙනුවෙන් වේලාවන් ඇතුළත් වූ අතර, නගරාධිපතිනිය සහ නියෝජ්‍ය නගරාධිපතිවරයා දරුවන්ගේ උද්යෝගය සැමරීම සඳහා මෙම වැඩ සටහන සමග එක්විය.

පොලිස් සේවා වනිතා ඒකකය මූලිකත්වයෙන් නවීන රූපලාවන්‍යාගාරයක් ලෙසින් වැඩිදියුණුකළ ක්ෂේත්‍ර බලකා මූලස්ථානයේ කොන්ඩා කැපුම් ස්ථානය (Saloon) වැඩබලන පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් විවෘත කෙරිණ.

අග්නිදිග විශ්වවිද්‍යාලයේ සිසුන් පිරිසක් අතර ඊයේ අලුයම ඇති වූ ගැටුමත් සමග අද පැවැත්වීමට නියමිතව තිබූ විභාග කටයුතු කල්දමා තිබේ. සරසවි මැදුර බෝයිස්විලා ටූ ශිෂ්‍ය නේවාසිකාගාරයට ඇතුළු වූ තුන්වැනි වසරේ සිසුන් කණ්ඩායමක් එහි සිටි පළමු වසරේ සිසුන් පිරිසකට අමානුෂික ලෙස පහර දීම හේතුවෙන් පළමු වසරේ සිසුන් 04 දෙනෙක් තුවාල ලබා රෝහල් ගතකර ඇත.

අදාළ ගැටුම සම්බන්ධයෙන් අංශ කිහිපයක් ඔස්සේ පොලිසිය සහ විශ්වවිද්‍යාල බලධාරීන් පරීක්ෂණ ආරම්භ කර ඇති අතර විශ්වවිද්‍යාල ප්‍රතිපාදන කොමිෂන් සභාව විසින් වාර්තාවක් කැඳවා ඇත. ගැටුමට සම්බන්ධ බවට සැකකෙරෙන කිසිවෙකුත් මේ වනවිටත් අත්අඩංගුවට ගෙන නොමැති අතර එකී හේතුවෙන් අද දිනයට පැවැත්වීමට නියමිතව තිබූ විභාග දින නියමයක් නොමැතිව කල් තැබීමට විශ්ව විද්‍යාල බලධාරීන් කටයුතු කොට ඇත.

රක්තහීනතාවයෙන් පෙළෙන රෝගීන්ගේ හෝ තැලසීමියා රෝගීන්ගේ ශරීරයෙන් අතිරික්ත යකඩ ඉවත් කිරීමට භාවිත කරනු ලබන ඩෙස් ෆෙරි ඔක්ක්සමින් මෙ සිලේට් එන්නත් බීපී මිලිග්‍රෑම් 500 න් වයල් 400,000 ක් මිල දී ගැනීම සඳහා වන ප්‍රසම්පාදනයට අමාත්‍ය මණ්ඩල අනුමැතිය හිමිවී ඇත.

ඒ සඳහා ලංසුකරුවන් දෙදෙනෙකු ලංසු ඉදිරිපත් කර තිබේ. ඉහළ මට්ටමේ ස්ථාවර ප්‍රසම්පාදන කමිටුවේ නිර්දේශය මත පදනම්ව ප්‍රතිචාරාත්මක එකම ලංසුකරු වන ශ්‍රී ලංකාවේ M/s. ABC Pharma Services (Pvt) Ltd. වෙත අදාළ ප්‍රසම්පාදනය පිරිනැමිම පිණිස සෞඛ්‍ය සහ ජනමාධ්‍ය අමාත්‍යවරයා වශයෙන් නලින්ද ජයතිස්ස මහතා ඉදිරිපත් කල අමාත්‍ය මණ්ඩල පත්‍රිකාවට අනුමැතිය හිමිවුණි.