අත්අඩංගුවට ගත් කෙහෙල්බද්දර පද්මේ ඇතුළු අපරාධකරුවන් පස්දෙනා දැඩි ආරක්ෂාවක් මැද කටුනායක ගුවන්තොටුපොළින් රැගෙන යයි.
පොලීසිය සඳහන් කරන්නේ ඔවුන් කොළඹ පිහිටි අපරාධ පරීක්ෂණ දෙපාර්තමේන්තුවේ රඳවාගෙන ප්‍රශ්න කිරීමට නියමිතව ඇති බවයි.
හිටපු ජනාධිපති රනිල් වික්‍රමසිංහ උසාවියට ඉදිරිපත් කල ලිපිය සත්‍ය බවට විශ්වවිද්‍යාලය විසින් සනාත කරමින් ලිපියක් එවා ඇත. මේ බව හිටපු ජනාධිපතිවරයාගේ මාධ්‍ය අධ්‍යක්ෂ ජනරාල් ලෙස කටයුතු කල ධනුෂ්ක රාමනායක සිය මුහුණු පොතේ සටහනක් තබමින් සනාථ කර ඇත.
ශ්‍රී ලංකාවේ ජනාධිපති රනිල් වික්‍රමසිංහට සහ බ්‍රිතාන්‍යයේ ශ්‍රී ලංකා මහ කොමසාරිස්තුමිය වන සරෝජා සිරිසේන යන අයට නිල වශයෙන් ආරාධනාපත්‍ර යැවූ බවට එංගලන්තයේ විශ්වවිද්‍යාලය විසින් එවූ ලිපියේ සඳහන් කර ඇත.
නිල වශයෙන් රාජ්‍ය නායකයාට සහ මහකොමසාරිස්වරියට එවන ලද ආරාධනයකට අනුව සහභාගී වීම පෞද්ගලික කාරනයක් නොවන බව එයින් සනාථ වන බව රනිල් වික්‍රමසිංහගේ නීතීඥයින් අවධාරණය කරයි
හිටපු ජනාධිපතිවරයා සාවාද්‍ය ලෙස සිරගත කිරීම සම්බන්ධයෙන් ඉදිරි සතියේදී මානව හිමිකම් නඩුවක් අධිකරණයට ගොනු කිරීමට නියමිත බව ද අප කල විමසීමකදී ඔවුන් අනාවරණය කළහ.
මෙරට සංවිධානාත්මක අපරාධ ජාලයේ ප්‍රසිද්ධ නායකයෙකු වන කෙහෙල්බද්දර පද්මේ ඇතුළු පාතාල කල්ලි සාමාජිකයින් 5 දෙනා රැගත් ගුවන් යානය අද (30) රාත්‍රී කටුනායක බණ්ඩාරනායක ජාත්‍යන්තර ගුවන්තොටුපොළ වෙත ළඟා වීමට නියමිත බව මහජන ආරක්ෂක අමාත්‍ය ආනන්ද විජේපාල මහතා සදහන් කළේය.
මෙම අපරාධකරුවන් ඉන්දුනීසියාවේ ජකර්තා නුවර සිට ගුවන්ගත වන අතර, ඔවුන්ව මෙරටට භාර දීමට ඉන්දුනීසියානු රජයේ සම්පූර්ණ සහය හිමිව ඇත.
ඉන්දුනීසියාවේදී අත්අඩංගුවටගත් කෙහෙල්බද්දර පද්මේ,කමාන්ඩෝ සලින්ද හෙවත් පිට්ටුවා,පානදුරේ නිලංග,බැකෝ සමන්,තැඹිලි ලහිරු යන පාතාල කල්ලි සාමාජිකයන් රැගෙන එන්නේ බස්නාහිර පළාත් උතුරු දිසා අපරාධ කොට්ඨාසයේ අධ්‍යක්ෂ, සහකාර පොලිස් අධිකාරි රෝහන් ඕලුගල සහ අපරාධ පරීක්ෂණ දෙපාර්තමේන්තුවේ (CID) ASPවරයකුගේ අධීක්ෂණය යටතේ, ඉන්දුනීසියානු පොලිස් කණ්ඩායමක් සමගයි.
ඉන්දුනීසියාවේ විමර්ශන කටයුතු ඉක්මනින් අවසන් වීම නිසා, මුලින් සැලසුම් කළ දවසට පෙරම ඔවුන්ව අද දිනයේ මෙරටට ගෙන එන බව ද වාර්තා වෙයි.
අපරාධ පරික්ෂණ දෙපාර්තමේන්තුවේත් පොලිස් විශේෂ කාර්ය බලකායේ කණ්ඩායම් මේ වනවිට ගුවන් තොටුපල පරිශ්‍රයේත් ඉන් පිටතත් රැඳී සිටිමින් ආරක්ෂාව තර කර තිබෙන බව වාර්තා වෙයි.
කෘෂිකර්මය සහ සංචාරක යන අංශ දෙකම ප්‍රවර්ධනය වන පරිදි කෘෂි සංචාරක ව්‍යාපාර නිර්මාණය කිරීමට රජය අවධානය යොමු කර ඇති බව වාර්තා වෙයි.
නියෝජ්‍ය අමාත්‍ය අරුන් හේමචන්ද්‍ර ත්‍රිකුණාමලයේ සත්ව නිෂ්පාදන ගොවිපොළක් නැරඹීමට එක්වූ අවස්ථාවේදී මේ බව හෙළිදරව් විය.
ත්‍රිකුණාමල ගොවිපොළ නවීන සත්ව නිෂ්පාදනය සඳහා කේන්ද්‍රස්ථානයක් ලෙස සංවර්ධනය කරන අතරම, කෘෂි සංචාරක ව්‍යාපාරය හරහා ප්‍රජා ජීවනෝපායන් නිර්මාණය කිරීමට කටයුතු සූදානම් කෙරේ.
මෙම ගොවිපොළ ත්‍රිකුණාමලයේ ජන ජීවිතය හා සමීප කරවීමට අවශ්‍ය කටයුතු සූදානම් කරන බව නියෝජ්‍ය අමාත්‍යවරයා ද මෙහිදී ප්‍රකාශ කළේය.
මිහින්තලේ දිග්ගල පිහිටි අනුලා සෑය සම්බන්ධ ප්‍රතිසංස්කරණ කටයුතු විහාරාධිපතිවරයෙකුට හෝ පුද්ගලයකුට පැවරීම නුසුදුසු ක්‍රියාවක් බව බෙල්ලන්විල විමලරතන නාහිමියෝ පවසති.
රත්මලාන පරමධම්මචේතිය පිරිවෙන් මහා විහාරස්ථානයේදී 2025.08.28 පැවති මාධ්‍ය හමුවකදී නාහිමියෝ සඳහන් කළේ, ”අනුලා සෑය ලෝක බෞද්ධයාම එකතු කරන මධ්‍යස්ථානයක් බවට ගොඩනගිය යුතු බවත්, එය පුද්ගල අයිතියට පැවරීමෙන් එම අරමුණ විනාශ වන බවත් ය. අනුලා සෑය ප්‍රතිසංස්කරණය කරල ලෝක බෞද්ධයාම එකතු කරන මධ්‍යස්ථානයක් කළ යුතුයි. ඒක පුද්ගලයකුට පැවරීමෙන් එම අරමුණ ඉටුවන්නේ නෑ. ලෝකයේ භික්ෂුණී සමාජයේ බලගතුම මධ්‍යස්ථානය මෙතන කරන්න පුලුවන්. ඒකට පළමුව මේ ස්ථානය ප්‍රතිසංස්කරණය කළ යුතුයි. දැන් ඒක විහාරාධිපති කෙනෙක් පත් කරල අනවශ්‍ය ප්‍රශ්නයක් නිර්මාණය කරල තියෙනවා” යැයි බෙල්ලන්විල නාහිමියෝ වැඩිදුරටත් ප්‍රකාශ කළහ.
මෙම අවස්ථාවට සහභාගී වූ ලෝක බෞද්ධ සංඝ සම්මේලනයේ මහා ලේඛකාධිකාරී මාඉටිපේ විමලසාර නාහිමියෝද තම මතය දැක්වීය. ඔහුගේ අදහස වූයේ, අනුලා සෑය පුරාවිද්‍යා දෙපාර්තමේන්තුවේ අධීක්ෂණය යටතේ නීත්‍යානුකූලව, නාගානන්ද විශ්වවිද්‍යාලයේ සහයෝගයෙන් ගොඩනගිය යුතු බවයි. “මෙය කඩාකප්පල් නොකිරීමටත්, අභූත චෝදනා මත මැදිහත් නොවීමටත් අවධානය යොමු කළ යුතුය” යැයිද ඔහු අවධාරණය කළේය.
එම මාධ්‍ය හමුවට සහභාගි වූ හිටපු පුරාවිද්‍යා අධ්‍යක්ෂ ජනරාල් මහාචාර්ය පී.බී. මණ්ඩාවල මහතා ද පැවසුවේ, අනුලා සෑය පුරාවිද්‍යා දෙපාර්තමේන්තුවට අයත් භූමියක් වන අතර එය කිසිවිටත් පුද්ගලයකුට පවරිය හෝ විකිණිය නොහැකි බවයි. 2022දී සොයාගත් අනුලා සෑයේ පුරාවස්තු මේ වනවිට අනුරාධපුරයේ පුරාවස්තු ගබඩාවල තබා ඇති බවත්, ඒවා රජයට අයත් වස්තුවල බවත් ඔහු පැවසීය.
“කණිෂ්ඨතිස්ස රජු විසින් මේ විහාරය සෑදුවේ භික්ෂූන්ගෙන් වෙන්ව භික්ෂූණීන් රැඳවීමේ අරමුණින්. එහෙම තැනක භික්ෂුවක් විහාරාධිපති ලෙස පත් කිරීම ගැටලුකාරී කරුණක්” යැයි මණ්ඩාවල මහාචාර්ය වැඩිදුරටත් ප්‍රකාශ කළේය.
ඩුබායි රාජ්‍යය ඇතුළු යුරෝපීය රටවල සැඟව සිටිමින් මෙරට විවිධ අපරාධ සහ මත්ද්‍රව්‍ය ජාවාරම මෙහෙයවන පාතාල ප්‍රබලයන් 18 දෙනෙකු එම රටවලදී අත්අඩංගුවට ගෙන මෙරටට රැගෙන ඒම සඳහා විමර්ශන අරඹා ඇතැයි අපරාධ පරීක්ෂණ දෙපාර්තමේන්තු ආරංචි මාර්ග සඳහන් කරයි.
මෙම 18 දෙනා සම්බන්ධ තොරතුරු සහ ඔවුන් රැඳී සිටින ස්ථාන පිළිබඳව ද මේ වන විට තොරතුරු ලැබී ඇති බවත් ඒ සම්බන්ධයෙන් මේ වන විට අධීක්ෂණය කරමින් සිටින බවත් එම දෙපාර්තමේන්තු ආරංචි මාර්ග පෙන්වා දෙයි.
විදෙස් රටවල සැඟව සිටින මෙරට සංවිධානාත්මක අපරාධකරුවන් 75 දෙනෙකු සඳහා රතු වරෙන්තු නිකුත් කර ඇති බවත් ඉන් 4 දෙනෙකු මේ වන විටත් එරට පොලිසි සහ ආරක්ෂක අංශ අත්අඩංගුවේ පසුවන බවත් වාර්තා වේ.
ඔවුන්ට එරෙහි එම රටවල නඩු කටයුතු සිදුවන බැවින් සමහරුන් එරට රක්ෂිත බන්ධනාගාරගත කර ඇති බවත් එම විමර්ශන නිම වීමෙන් පසු ඔවුන් මෙරටට ගෙන්වීමට කටයුතු කරන බවත් කියැවේ.
කෙසේ වෙතත්, මෙම 18 දෙනා අත්අඩංගුවට ගෙන මෙරටට ගෙන ඒම සඳහා රාජ්‍යතාන්ත්‍රික මට්ටමින් ජාත්‍යන්තර පොලිසියේද සහාය ඇතිව විමර්ශන කිරීම සහ සාකච්ඡා පැවැත්වෙන බවද එම ආරංචි මාර්ග සඳහන් කරයි.
මිනිස් ඝාතන, වෙඩි තැබීම්, කප්පම් ගැනීම්, පාතාල ක්‍රියාකාරකම් ආදිය සිදුකොට මෙරටින් පලා ගිය සමහරුන් සිය අඹු-දරුවන්ද එම රටවලට ගෙන්වාගෙන එම රටවල සිට මෙරට විවිධ අපරාධවල නියැළෙති.
කෙසේ වෙතත්, මෙරට පොලිසිය ඉන්දුනීසියානු පොලිසිය සමඟ එක්ව කළ රහසිගත මෙහෙයුමත් සමඟ ප්‍රබල සංවිධානාත්මක අපරාධකරුවන් රැසක් ම මේ වන විට බියට පත්ව ඇති බව ද පොලිස් ආරංචි මාර්ග පෙන්වා දේ.
සැකකරුවන් අත්අඩංගුවට ගෙන මෙරටට රැගෙන ඒම සඳහා පොලිස්පතිවරයාගේ උපදෙස් මත අපරාධ පරීක්ෂණ දෙපාර්තමේන්තුවේ ජ්‍යෙෂ්ඨ නියෝජ්‍ය පොලිස්පති අසංක කරවිටගේ උපදෙස් මත පොලිස් කණ්ඩායම් කිහිපයක් විමර්ශනය සිදු කරයි.
ශ්‍රී ලංකා මහ බැංකුවේ බැඳුම්කර සිද්ධිය සම්බන්ධයෙන් පූර්ණ විමර්ශනයක් ආරම්භ කිරීමට රජයේ නීති අංශ කටයුතු කරමින් සිටින බව ආරංචි මාර්ග පවසයි.
විශාල පරිමාණයේ වංචා හා දූෂණවලට සම්බන්ධ කිසිවකුටත් නිදහස නොදීමේ රජයේ ප්‍රතිපත්තිය මත මෙම විමර්ශනය ආරම්භ කර ඇත.
මේ සම්බන්ධයෙන් විමසූ විට නීතිඥ සුනිල් වටගල ප්‍රකාශ කළේ, අදාළ රාජ්‍ය කාලය තුළ මෙම සිද්ධියේ සාක්ෂි සූක්ෂම ලෙස යටපත් කර ඇති බවත්, එම සාක්ෂි සොයා බැලීමේ කටයුතු මේ වන විට නීති අංශ විසින් සිදුකරමින් පවතින බවත්ය.
පොහොසත් රටක් නිර්මාණය කිරීමේ අදහස් ඇතිව කටයුතු කරන ජනාධිපතිවරයෙකු විදෙස්ගත වූ විට රාජ්‍ය නායක පෞරුෂයට ඔබින ආකාරයට ඉහළම පහසුකම් භුක්ති විඳිමින් කටයුතු කරන බව සර්වජන බලය නායක, පාර්ලිමේන්තු මන්ත්‍රී දිලිත් ජයවීර පවසයි.
“රාජ්‍ය නායකයෝ විදෙස්ගත වුණාම ඒ රටේ තියෙන හොඳම වාහනේ යනවා. ඒ රටේ හොඳම මිනිස්සු ආශ්‍රය කරලා. හොඳම වයින් එක බීල, හොඳම තේ බිලා තමයි වැඩකරන්නේ. මිනිස්සුන්ට ධනය නිර්මාණය කරන්න ඕන රටක් හදන්න උවමනාවක් තියෙන රාජ්‍ය නායකයෙක් කටයුතු කරන්නේ එහෙමයි.
සහෝදරයන්ගෙන් කාල, ලන්ඩන්වල කොත්තු කඩේකින් කාලා නෙමෙයි, ජනාධිපතිවරු රටවල් හදන්නේ. ජනාධිපතිවරයෙකුට අවශ්‍ය පෞරුෂය, ඒක නිර්මාණය වන පරිසරය හදා ගන්නේ එහෙම තමයි. මෝදි ඉන්දියාව දියුණු කරන්න කලින් පෞද්ගලික ජෙට් යානයකින් ඇමරිකාවට ගියේ. එහෙමයි ඒ රාජ්‍යෙය් පෞරුෂය ජාත්‍යන්තරයේ ගොඩනගන්නේ.
අනුර ජනාධිපතිතුමා රට රටවල ගිහින් යාළුවන්ගේ ගෙවල්වල ඉඳලා වියදමට රාජ්‍යය වෙන් කළ සල්ලි ආයෙම ගෙනැත් ආඩම්බරෙන් භාරදෙනවා. මම දිගින් දිගටම කියනවා, එතුමාට ඔය හිඟන වැඩේ කරන්න එපා කියලා. ඒ නිසා හිටපු ජනාධිපති රනිල් අත් අඩංගුවට ගැනීමේ තිරපිටපත ජාත්‍යන්තර මාධ්‍ය වර්තා කරන විදිහ දැක්කාම අපට ලැජ්ජායි. මහ බැංකු වංචාවට රනිල් අත් අඩංගුවට ගත්තා නම් අපට ලෝකය ඉස්සරහා ඒ ගැන ආඩම්බරෙන් කතා කරන්න තිබුණා.
අපි හිඟන විදිහට හිතන්න නරකයි. අපි ලොකුවට හිතන්න ඕන. අපි ඉතිහාසයේ ලොකුවට හිතුව ජාතියක්. අපි හැදිවේ මහ වැව්. වැව් නෙමෙයි සමුද්‍ර. පරාක්‍රම සමුද්‍රය හැදුවේ. මේ වගේ හිතුවා නම් ඒ කාලේ හදන්නේ ආඬු ළිං. මොකද දෙකෙන්ම වතුර ගන්න පුළුවන්. ආඬි ළිං කපන ආණ්ඩුයි, පරාක්‍රම සමුද්‍ර හදන ආණ්ඩුයි එකක් නෙමෙයි, දෙකක්.”
දිලිත් ජයවීර මේ බව ප්‍රකාශ කළේ මොනරා පුවත්පත සමග සාකච්ඡාවකට එකතු වෙමිනි.
කාටුනය උපුටා ගැනීම : ද අයිලන්ඩ් පුවත්පත
කඩිනම් සහ අවුල් සහගත, සැලැස්මකින් තොරව විදුලිබල ක්ෂේත්‍ර ප්‍රතිසංස්කරණ ක්‍රියාවලියක් ක්‍රියාත්මක කරන බව ලංකා විදුලිබල මණ්ඩල ඉංජිනේරු සංගමය (CEBEU) විසින් ආණ්ඩුවට චෝදනා කරයි.
මෙම ක්‍රියාවලිය හේතුවෙන් රට පුරා විදුලි විසන්ධි වීම් ඇතිවීමට, විශාල වශයෙන් සේවකයන් ඉවත්ව යාමට සහ සමස්ත ක්ෂේත්‍රයම අස්ථාවර වීමට ඉඩ ඇති බවට සංගමය අනතුරු අඟවා තිබේ.
සංගමය සඳහන් කළේ, බලධාරීන් නීතිමය අවශ්‍යතා නොසලකා හරිමින් සහ ශ්‍රේෂ්ඨාධිකරණයේ නියෝග මෙන්ම විදුලිබල ක්ෂේත්‍ර ප්‍රතිසංස්කරණ පනතේ විධිවිධානද නොසලකා හැර, සේවක පැවරුම් ලිපි නිකුත් කර ඇත්තේ “ඉතා සරල ආකාරයකට” බවයි.
“වර්තමාන ප්‍රතිසංස්කරණ බලධාරීන් තුළ නිසි වගකීමක් හා ක්‍රියා පටිපාටියක් නොමැත. මෙය රටේ වඩාත් තීරණාත්මකම ක්ෂේත්‍රය වුවද, සමහරු ප්‍රතිසංස්කරණ ක්‍රියාවලිය සරලව සලකති. එහි අවසාන ප්‍රතිඵලය කුමක් වේවිද?” යනුවෙන් CEBEU හි සම ලේකම් ඉංජිනේරු අමල් ආරියරත්න මහතා පැවසීය.
ආණ්ඩුව මේ මස මුලදී ප්‍රතිසංස්කරණ පනත සංශෝධනය කරනු ලැබුවේ, බෙදාහැරීමේ සහ උත්පාදන සමාගම්වල කොටස් (ජල විදුලි සම්පත් හැර) සම්පූර්ණයෙන් විකිණීමට ඉඩ ලබා දීම සඳහායි. කෙසේ වෙතත්, සේවකයන් සඳහා වූ මාස දෙකක දැනුම් දීමේ කාලය ආරම්භ වූයේ කවදාද යන්න පිළිබඳව මිශ්‍ර වූ පණිවිඩ ලැබීම නිසා ප්‍රතිසංස්කරණ ක්‍රියාවලිය දැනටමත් ව්‍යාකූල තත්ත්වයක පවතින බව සංගමය පවසයි.
“අවශ්‍ය ලේඛන කටයුතු සම්පූර්ණ කිරීමෙන් පසු ගණන් කිරීම ආරම්භ කරන බවට පොරොන්දු වුවද, බලධාරීන් අගෝස්තු 27 වැනි දා සිට කාලය ගණනය කිරීම ආරම්භ වූ බව පවසමින් මහජනයා නොමඟ යවමින් සිටී” යැයි සම ලේකම්වරයා චෝදනා කළේය. “අපි වහාම මැදිහත් වන ලෙස ජනාධිපතිතුමාගෙන් ඉල්ලා සිටිමු. මෙම වැරදි කළමනාකරණය තවදුරටත් ඉදිරියට ගෙන යා නොහැක.”
CEBEU සංගමය වැඩිදුරටත් අනතුරු අඟවා ඇත්තේ, රුපියල් මිලියන 5කට සීමා කර ඇති වර්තමාන ස්වේච්ඡා විශ්‍රාම ගැනීමේ යෝජනා ක්‍රමය “ප්‍රමාණවත් නොවන” බවයි. එමඟින් ඉහළ නිපුණතාවලින් යුතු ඉංජිනේරුවන් සහ තාක්ෂණික කාර්ය මණ්ඩලය විදේශ රැකියා සඳහා යොමුවීමට ඉඩ ඇති බවද සඳහන් කරයි.
“අත්දැකීම් සහිත කාර්ය මණ්ඩලය ඉවත්ව ගියහොත්, මෙම ක්ෂේත්‍රය අඩපණ වන අතර, විදුලි කප්පාදු කිරීම් නොවැළැක්විය හැකි වනු ඇත. අපි සිටින්නේ අර්බුදයක අද්දර” යැයි එම ප්‍රකාශයේ දැක්වේ.
ප්‍රතිසංස්කරණ සැලසුම්කරුවන්ට බිම් මට්ටමේ යථාර්ථයන් නොසලකා හරින බවට චෝදනා කළ සංගමය, ප්‍රතිව්‍යුහගත කිරීමේ ක්‍රියාවලිය “නැවත සලකා බලා නිවැරදි කරන ලෙස” ආණ්ඩුවෙන් ඉල්ලා සිටියේය.
“මෙය සැබවින්ම ජනතා කේන්ද්‍රීය ආණ්ඩුවක් නම්, ප්‍රතිසංස්කරණ පෞද්ගලික න්‍යාය පත්‍ර සඳහා නොව, මහජන අරමුණට සේවය කළ යුතුයි” යනුවෙන් සම ලේකම්වරයා අවධාරණය කළේය.
ශ්‍රී ලංකා විදුලි බල සං‍ශෝධන පනතේ ස්වේච්ඡා විශ්‍රාම යාමේ යෝජනා ක්‍රමයේ නියාමනයන් හා කොන්දේසි ගැසට් කර තිබේ.
මෙම ගැසට් නිවේදනය නිකුත් කර ඇත්තේ, බලශක්ති අමාත්‍ය කුමාර ජයකොඩි මහතාගේ අත්සනින් යුතුව වන අතර, මෙය නිකුත්වන්නේ 2024 අංක 36 දරන ශ්‍රී ලංකා විදුලි බල පනතේ 18 වන වගන්තියේ තුන්වන උප වගන්තියට අදාළවය.
වසර 10ක් හෝ ඊට වැඩි සේවා කාලයක් සපුරා ඇති සේවකයෙකු ස්වේච්ඡාවෙන් විශ්‍රාම යන අවස්ථාවකදී ඔහු සේවයේ යෙදුනු සේවා කාලයේ සෑම මාස 12ක් සඳහාම මාස දෙකක වැටුප සහ සේවය කිරීමට ඉතිරිව ඇති කාලයේ සෑම මාස 12ක් සඳහාම මාස එකහමාරක වැටුප වන්දි වශයෙන් හිමිවන බව එම ගැසට් නිවේදනයේ සඳහන් වෙයි.
ඊට අමතරව කොන්ත්‍රාත් පදනම යටතේ සේවය කරන සේවකයින්ට වන්දි ලබාදෙන ආකාරය මෙන්ම තවත් නියාමනයන් සහ කොන්දේසි කිහිපයක්ද ගැසට් නිවේදනයේ දක්වා තිබේ.
