දෙමටගොඩ ප්‍රදේශයේ පුද්ගලයෙකු මත්ද්‍රව්‍ය ජාවාරමෙන් උපයාගෙන ඇති රුපියල් කෝටි 10කට ආසන්න වටිනාකමකින් යුත් දේපළ තහනම් කිරීමට නීති විරෝධී වත්කම් විමර්ශන කොට්ඨාසය විසින් කටයුතු කර තිබේ.
පොලිසිය සඳහන් කළේ ඊට අදාළ නියෝගය ඊයේ (21) කොළඹ ප්‍රධාන මහේස්ත්‍රාත් අධිකරණය විසින් නිකුත් කළ බවයි.
බම්බලපිටියේ මුදල් ප්‍රවාහනය කරන ආයතනයක වෑන් රථයකින් රුපියල් කෝටියකට අධික මුදල් මල්ලක් සොරා ගත් එම ආයතනයේම රියදුරා පැමිණිල්ල ලැබී පැය 24 ක් තුළදී අත්අඩංගුවට ගත් බව බම්බලපිටිය පොලිසිය පවසයි.
අස්ථානගත වූ මුදල් මල්ලේ තිබු රුපියල් එක්කෝටි තුන්ලක්ෂ අනූ හයදාහසක මුදලක් පොලිසිය මගින් සොයා ගෙන තිබෙනවා.
එකී මුදල් තොගය අතර වලංගු මුදල් රුපියල් 10,000,000/=, පළුදු නෝට්ටු රුපියල් 6000/= , රුපියල් 390,000/= ක් වටිනා ඇමෙරිකන් ඩොලර් 1300 ක් තිබු බව පොලිසිය සඳහන් කරයි.
බම්බලපිටිය ෆොන්සේකා පෙදෙසේ පිහිටි මූල්‍ය ආයතනවල මුදල් එක්රැස් කිරීම සහ බෙදාහැරීම සිදු කරනුු ලබන ආයතනයක ඉකුත් 13 වෙනිදින කොළඹ ප්‍රදේශයේ පිහිටි ඒ ටි එම් කුටි 15 ක එක් රැස්ව තිබූ මුදල් රියැදුරු ඇතුළු සිව් දෙනකු විසින් එකතු කරගෙන බම්බලපිටියේ ආයතනය වෙත පැමිණ තිබූ බව පොලිසිය පවසයි.
ඔවුන් විසින් මුදල් මලු 15 ක් රැගෙන ආවද මුදල් එකතු කිරීම සඳහා ගිය නිලධාරීන් ආයතන වෙත භාරදී ඇත්තේ මුදල් මලු 14 ක් බවත්, වැල්ලවත්ත ප්‍රදේශයේ පෞද්ගලික බැංකුවක ඒ ටී එම් කුටියෙන් ලබා ගත් රුපියල් කෝටියකට අධික මුදල් අඩංගු මල්ල බාරදී නොමැති බවට එම ආයතනයේ ජ්‍යෙෂ්ඨ මෙහෙයුම් කළමනාකරු පොලිසිය වෙත පැමිණිලි කර තිබේ.
ඒ අනුව බම්බලපිටිය පොලිසියේ ස්ථානාධිපති ප්‍රධාන පොලිස් පරීක්ෂක සම්පත් පද්මලාල් මහතාගේ උපදෙස් මත අපරාධ විමර්ශන අංශයේ ස්ථානාධිපති උප පොලිස් පරීක්ෂක කසුන් වික්‍රමසිංහ මහතා ඇතුළු කණ්ඩායමක්, මුදල් එකතු කිරීම සඳහා ගිය කණ්ඩායමේ නිලධාරීන් තිදෙනාගෙන්ද හා රියදුරාගෙන් ප්‍රකාශ ලබා ගැනීමෙන් අනතුරුව පැති කීපයක් ඔස්සේ විමර්ශන සිදුකර අනතුරුව සීසීටිවි දර්ශනද පරික්ෂාවට ලක් කිරීමට කටයුතු කළ බව පොලිසිය පවසයි.
ඒ අනුව විමර්ශන සිදුකළ පොලිස් කණ්ඩායම සැකකරුගේ මඟ පෙන්වීම මත සැකකරු පදිංචි පයාගල නිවස වෙත ගොස් කාමරයේ අල්මාරියේ සඟවා තිබූ රුපියල් එක්කෝටි තුන් ලක්ෂ අනූ හයදාහක් මුදලක් අඩංගු මුදල් බෑගය සොයා ගැනීමට සමත් වී තිබේ.
අත්අඩංගුවට ගත් සැකකරු මීට මාස හයකට පමණ ඉහතදී සේවයට පැමිණි පුද්ගලයකු බවත් පොලිසිය සඳහන් කරන අතර, 34 හැවිරිදි සැකකරු අධිකරණය වෙත ඉදිරිපත් කිරීමට නියමිතය.
බම්බලපිටිය පොලිසියේ ස්ථානාධිපති ප්‍රධාන පොලිස් පරික්ෂක සම්පත් පත්මලාල් මහතාගේ උපදෙස් මත අපරාධ විමර්ශන අංශයේ ස්ථානාධිපති උප පොලිස් පරීක්ෂක කසුන් වික්‍රමසිංහ මහතා ඇතුළු නිලධාරීන් කණ්ඩායමක් පරීක්ෂණ පවත්වයි.
ජනලේඛන සහ සංඛ්‍යාලේඛන දෙපාර්තමේන්තුව 2025 ජූලි මාසය සඳහා ශ්‍රී ලංකාවේ ජාතික පාරිභෝගික මිල දර්ශකය (ජා.පා.මි.ද.) සහ මාසික පාරිභෝගික උද්ධමනය ප්‍රකාශයට පත් කරයි.
ඒ අනුව 2025 ජූනි මාසයේ දී 0.3% ක් ලෙස වාර්තා වූ මෙරට උද්ධමනය 2025 ජූලි මාසය සඳහා 0.7% ක් දක්වා වැඩි වී ඇත.
2025 ජූනි මාසයේ දී 4.2% ක් ලෙස වාර්තා වූ ආහාර කාණ්ඩයේ ලක්‍ෂ්‍යමය උද්ධමනය 2025 ජූලි මාසයේ දී 2.2% ක් දක්වා අඩු වී ඇත.
එමෙන්ම, 2025 ජූනි මාසයේ දී -2.8% ක් වූ ආහාර නොවන කාණ්ඩයේ ලක්‍ෂ්‍යමය උද්ධමනය 2025 ජූලි මාසයේ දී -0.6% ක් දක්වා වැඩි වී ඇත.
වත්මන් ආණ්ඩුව යටතේ ආනයනය කරන ලද හියුමන් ඉමියුනොග්ලොබියුලින් එන්නත් කළ තිදෙනකු මිය ගොස් තිබෙන බව කුරුණෑගල දිස්ත්‍රික් මන්ත්‍රි දයාසිරි ජයසේකර මහතා ඊයේ ( 21) පාර්ලිමේන්තුවේ දී පැවසීය.
මෙම හියුමන් ඉමියුනොග්ලොබියුලින් එන්නත් ෆාමා ඇසෝසියේට් (Pharma Associates) විසින් ගෙන්වා ඇත.
රේගු ආඥා පනත යටතේ යෝජනා සම්මතය, නිෂ්පාදන බදු (විශේෂ විධිවිධාන) පනත යටතේ නියමය, මුදල් පනත යටතේ නියෝගය සහ ඉදිකිරීම් කර්මාන්ත සංවර්ධන පනත යටතේ නියෝග සම්බන්ධ විවාදයට එක්වෙමින් මන්ත්‍රිවරයා මේබව කීය.
ඔහු වැඩිදුරටත් මෙසේද පැවසීය.
“හියුමන් ඉමියුනොග්ලොබියුලින් ප්‍රශ්නය ආවම කෙහෙළිය රඹුක්වැල්ල හිරේ දැම්මා. හියුමන් ඉමියුනොග්ලොබියුලින් ගෙනාපු සමාගමේ සාම්පල් ලංකාවේ ෆෙල් වුණා. ඒක බෙදන්න එපා කියලා නැවැත්තුවා. නවත්වලා මේ ගැන එන්. එම්. ආර්. ඒ. එක පරීක්ෂණයක් කළා. පරීක්ෂා කළාට පසුව ඒක ෆේල් කියලා අඳුනගත්තා. පස්සෙ මොකක්ද වුණේ මේ බඩු ටික ඉවත් කරන්න කිව්වා. ඉවත් කිරීම පැත්තක තියලා ඉන්දියානු සමාගම ගිහිල්ලා ඉන්දියාවෙන් සහතිකයක් අරගෙන ආවා. සාමාන්‍යයෙන් ඉන්දියාවෙ නිෂ්පාදනයක් ඉන්දියාවෙන් චෙක් කරන්නෙ නැහැ. එක්කෝ ජර්මනියෙන් නැත්නම් වෙනත් රටකින් තමයි චෙක් කරන්නේ. නමුත් අවසානයේ මොකක්ද වුණේ. මේ වෙනකොට තුන් දෙනෙක් මිය ගිහිල්ලා.”
“එක්කෙනෙක් කොළඹ උතුර රෝහලේ දී මිය ගියා. ඔහු කේ.ඩී. සුජීව. ඊළඟට ඩබ්ලිව්.ඩී. නන්දසේන කියලා කෙනෙක් නුවර රෝහලේ දි මිය ගියා. මේ දෙන්නාම ළඟදි මිය ගිය අය. ඊට කලින් ත්‍රිකුණාමලයෙදි එක් කෙනෙක් මිය ගියා. මේ ආණ්ඩුව යටතේ ගෙනාපු හියුමන් ඉමියුනොග්ලොබියුලින් ගහපු තුන් දෙනෙක් මිය ගොස් තිබෙනවා. දැන් කවුද මේකට වගකියන්නෙ. කවුද මේකට හිරේ යන්න ඕන. එන්. එම්. ආර්. ඒ. එක නවත්වපු එකක් ආපහු ගහන්න ඉඩ දුන්නේ නැහැ. ඉවත් කරන්න කියපු එකක් යළිත් පරීක්ෂා කරන්න කියලා කිව්වෙ නැහැ. කෙහෙළිය රඹුක්වැල්ලට වැඩිය මේක භයානක කාරණයක්. මොකද හේතුව මේකෙ තුන් දෙනෙක් මැරිලා තියෙනවා. මේ ගැන ආණ්ඩුව මොකක්ද කියන්නෙ කියලා දැන ගන්න කැමැතියි.”
ශ්‍රී ලංකාවට ගල් අඟුරු ආනයනය කිරීමේ ටෙන්ඩර් පිරිනැමීමේදී සිදුව ඇතැයි කියන බරපතල වංචාවක් පිළිබඳව පාර්ලිමේන්තු මන්ත්‍රී ඩී.වී. චානක මහතා විසින් පාර්ලිමේන්තුව හමුවේ අදහස් දක්වනු ලැබීය.
ඒ මහතාගේ ප්‍රකාශය අනුව, මෙම ටෙන්ඩර් ක්‍රියාවලිය ජාත්‍යන්තර ප්‍රසම්පාදන මාර්ගෝපදේශ උල්ලංඝනය කරමින් සිදු වී ඇත.
ජාත්‍යන්තර ප්‍රසම්පාදන කටයුතු සඳහා ටෙන්ඩර්කරුවන්ට සාමාන්‍යයෙන් සති හයක කාලයක් ලබා දිය යුතු වුවද, මෙම ගල් අඟුරු ටෙන්ඩරය සඳහා එම කාලය මුලින් සති පහ දක්වාත්, පසුව සති තුන දක්වාත් අඩු කර ඇති බව මන්ත්‍රී චානක මහතා පෙන්වා දුන්නේය.
කාලය කෙටි කිරීමේ ක්‍රියාවලිය: කැබිනට් පත්‍රිකා අංක 78/2025P මඟින් ටෙන්ඩර් කාලය සති පහක් දක්වා අඩු කර ඇති බවත්, පසුව රටේ ගල් අඟුරු හිඟයක් ඇති වන බව පවසමින් ජාතික ප්‍රසම්පාදන කොමිෂන් සභාවෙන් සති පහක කාලය සති තුනක් දක්වා අඩු කරවා ගෙන ඇති බවත් ඒ මහතා ප්‍රකාශ කළේය.
ටෙන්ඩරය මාස එකහමාරක් ප්‍රමාද කර ඇති අතර, පෙර ආණ්ඩුව සමයේ “දූෂිත” සහ “වංචාකාරී” යැයි චෝදනා ලැබූ සමාගමකටම අලුතින් මාස හයක කාලයක් ලබා දී ඇති බවට චානක මහතා චෝදනා කළේය.
සති තුනක් වැනි කෙටි කාලයකින් ජාත්‍යන්තර ටෙන්ඩරයක් වසා දැමීම අසාමාන්‍ය බවත්, මෙය තමන්ට හිතවත් පාර්ශ්වයකට ටෙන්ඩරය ලබා දීම සඳහා සකස් කරන ලද ක්‍රමවේදයක් බවත් මන්ත්‍රීවරයා ප්‍රකාශ කළේය.
මෙම ටෙන්ඩරය සඳහා සාමාන්‍යයෙන් ඇමෙරිකානු ඩොලර් මිලියන 15ත් 30ත් අතර කාර්යසාධන බැඳුම්කරයක් තැබිය යුතු බවත්, එය සූදානම් කරගෙන සිටින හිතවත් පාර්ශ්වයකට ටෙන්ඩරය ලබා දීමට සූදානම් වන බවත් ඔහු වැඩිදුරටත් කියා සිටියේය.
ගල් අඟුරු ටෙන්ඩරයට අත්සන් කිරීම ප්‍රතික්ෂේප කරමින් සභාපතිවරයකු සිය තනතුරෙන් ඉල්ලා අස්වීමේ ලිපියක් යවා ඇති බව ද ඩී.වී. චානක මහතා හෙළි කළේය.
මන්ත්‍රී ඩී.වී. චානක මහතාගේ ප්‍රකාශය සම්බන්ධයෙන් ප්‍රශ්නයක් නැගූ පාර්ලිමේන්තු මන්ත්‍රී අජිත් පෙරේරා මහතා, මෙම ප්‍රශ්නය ඩොලර් බිලියනයකට වඩා වටිනා බරපතල දූෂණයක් බව අවධාරණය කළේය. ඔහු චානක මහතාගෙන් විමසා සිටියේ මෙම ප්‍රකාශ වගකීමෙන් යුතුව කරන්නේද, ඒ සඳහා සාක්ෂි තිබේද යන්නයි. තවද, දූෂණයට විරුද්ධ අමාත්‍යවරයෙකු මෙවැනි වරදක් කරනු ඇතිදැයි ඔහු ප්‍රශ්න කළේය.
ඊට පිළිතුරු දෙමින් මන්ත්‍රී ඩී.වී. චානක මහතා අවධාරණය කළේ, මෙම වංචාව සඳහා අවශ්‍ය කටයුතු සූදානම් කරගෙන මෙම ආණ්ඩුව කටයුතු කරන බවයි.
එහි දී ඩී.වී. චානක මහතා අදාළ ගනුදෙනුව සඳහා අනුමැතිය ලබා ගත් ගැසට් පත්‍රය සභාගත කළේය.
රාජ්‍ය මුදල් අවභාවිත කිරීම සම්බන්ධව ප්‍රකාශයක් ලබාගැනීම සඳහා හිටපු ජනාධිපති රනිල් වික්‍රමසිංහ මහතාට අද (22) අපරාධ පරීක්ෂණ දෙපාර්තමේන්තුවට පැමිණෙන ලෙස දන්වා තිබේ.
ජනාධිපතිවරයා ලෙස කටයුතු කරන සමයේදී ඇමරිකා එක්සත් ජනපදයේ පැවැති රාජ්‍ය නායක සමුළුවකට සහභාගිවී ලන්ඩන් නුවර හරහා මෙරටට පැමිණීමේදී රාජ්‍ය මුදල් අවභාවිතාවී තිබෙන බවට ලද පැමිණිල්ලකට අනුව අපරාධ පරීක්ෂණ දෙපාර්තමේන්තුව විසින් හිටපු ජනාධිපතිවරයාට මෙම දැනුම්දීම සිදුකර ඇත.
හිටපු ජනාධිපතිවරයා ලන්ඩන් නුවරට ගොස් ඇත්තේ සිය බිරිඳ වන මහාචාර්ය මෛත්‍රී වික්‍රමසිංහගේ උපාධි ප්‍රධානෝත්සවයකට එකතුවීම සඳහාය.
මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව මීට පෙරදී හිටපු ජනාධිපති ලේකම් සමන් ඒකනායක සහ හිටපු ජනාධිපතිවරයාගේ පුද්ගලික ලේකම් සැන්ඩ්‍රො පෙරේරාගෙන්ද ප්‍රකාශ ලබාගෙන තිබිණි.
හිටපු ජනාධිපතිවරයා අපරාධ පරීක්ෂණ දෙපාර්තමේන්තුවට ගොස් සිය ප්‍රකාශය ලබාදීමෙන් පසුව කොළඹ, මල්පාරේ පිහිටි ඔහුගේ කාර්යාලයයේදී අද (22 ) මාධ්‍ය හමුවක්ද පැවැත්වීමට නියමිතය.
රජයේ ආයතනවල අනවශ්‍ය ලෙස එකතු වී ඇති ද්‍රව්‍ය ඉවත් කිරීමේ අරමුණින් විශේෂ වැඩසටහනක් වන ‘සේරි සතිය’ ආරම්භ කර ඇති බව රජය නිවේදනය කරයි. මෙම වැඩසටහන සැප්තැම්බර් මස 1 වැනිදා සිට 14 වැනිදා දක්වා ක්‍රියාත්මක කිරීමට නියමිතය.
මෙම වැඩසටහනේ ප්‍රධාන අරමුණ වන්නේ රජයේ ආයතන තුළ පිරිසිදු, සුරක්ෂිත සහ සෞඛ්‍යාරක්ෂිත පරිසරයක් නිර්මාණය කිරීමයි. එමඟින් රාජ්‍ය නිලධාරීන්ට තම රාජකාරි වඩාත් නිදහසේ හා කාර්යක්ෂමව ඉටු කිරීමට අවස්ථාව සැලසෙනු ඇත.
වැඩසටහන පහසු කිරීම සඳහා රාජ්‍ය පරිපාලන, පළාත් සභා හා පළාත් පාලන අමාත්‍යාංශයේ ලේකම්වරයා විසින් විශේෂ චක්‍රලේඛයක් නිකුත් කර තිබේ. එම චක්‍රලේඛය අමාත්‍යාංශ ලේකම්වරුන්, පළාත් ප්‍රධාන ලේකම්වරුන්, දෙපාර්තමේන්තු ප්‍රධානීන්, දිස්ත්‍රික් ලේකම්වරුන් සහ රාජ්‍ය ආයතන හා ව්‍යවස්ථාපිත මණ්ඩල ප්‍රධානීන් වෙත යොමු කර ඇත.
‘සේරි සතිය’ වැඩසටහන ජාතික ‘Clean Sri Lanka’ වැඩසටහනට සමගාමීව ක්‍රියාත්මක වන අතර, එහිදී අත්‍යවශ්‍ය නොවන ද්‍රව්‍ය හඳුනාගෙන ඒවා නිසි ලෙස බැහැර කිරීම කෙරෙහි විශේෂ අවධානයක් යොමු කෙරේ.
අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ප්‍රවාහන සුභසාධන සංගමය මගින් පස්වැනි වරටත් සංවිධානය කරන ලේ දන් දීමේ වැඩසටහන අධ්‍යාපන අමාත්‍යාංශ ඉසුරුපාය පරිශ්‍රයේදී පැවැත්විණි.
අග්‍රාමාත්‍ය, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය හරිනි අමරසූරියගේ ප්‍රධානත්වයෙන් සහ අධ්‍යාපන හා උසස් අධ්‍යාපන නියෝජ්‍ය අමාත්‍ය මධුර සේනෙවිරත්න සහ අධ්‍යාපන ලේකම්තුමාගේ සහභාගීත්වයෙන් ආරම්භ වූ අතර ශ්‍රී ජයවර්ධන පුර සහ අපේක්ෂා රෝහල් සඳහා අවශ්‍ය ලේ ප්‍රදානය කිරීම මෙම වැඩසටහනේ ප්‍රධාන අරමුණයි.
ආගමන හා විගමන පනත යටතේ චෝදනා ලබා සිටින හිටපු රාජ්‍ය අමාත්‍ය ඩයනා ගමගේ මහත්මිය, නඩු විභාගය සඳහා අධිකරණය පෙනී නොසිටීම හේතුවෙන් අත්අඩංගුවට ගන්නා ලෙස වරෙන්තු නිකුත් කර තිබේ.
මෙම නඩුව අද (21) කොළඹ ප්‍රධාන මහෙස්ත්‍රාත් තනූජා ලක්මාලී ජයතුංග මහත්මිය ඉදිරියේ කැඳවූ අවස්ථාවේදී, විත්තිකාරිය අධිකරණය නොපැමිණීම හේතුවෙන් එම තීරණය ගන්නා ලදි.
අදාළ නඩු කටයුත්ත තුළ, ඩයනා ගමගේ මහත්මියගේ ඇපකරුවන්ටද නොතීසි නිකුත් කරන ලෙස අධිකරණය නියෝග කරන ලදී.
මුදල් මුද්‍රණය නොකරන බවක් ආණ්ඩුව ප්‍රකාශ කළ ද 2024 ඔක්තෝබර් මාසයේ සිට මේ දක්වා රුපියල් බිලියන 1427.9ක් පුළුල් ඒකාබද්ධ මුදල් සැපයුම තුළින් (M2b) මුදල් මුද්‍රණය කර ඇති බව හිටපු මුදල් අමාත්‍යවරයකු වන පාර්ලිමේන්තු මන්ත්‍රී රවී කරුණානායක මහතා පවසයි.
“රජයට සල්ලි මුද්‍රණය කරන එක අත්‍යාවශ්‍යයි. හැබැයි ඒක කරන්න අවශ්‍ය වන්නේ වත්කමක් සමග. මේ ප්‍රශ්නය ඇහුවාම කියලා තියෙනවා ආණ්ඩුව සල්ලි මුද්‍රණය කරන්නෙ නැහැයි කියලා. නමුත් මුද්‍රණය කරනවා. මුද්‍රණය කරන්නෙ නැත්නම් ආර්ථිකය සංකෝචනය වෙනවා. මේක පාවිච්චි කරලා තියෙන්නෙ මොන සංවර්ධනයටද කියන එකයි ප්‍රශ්නය. මේක පුනරාවර්තන වියදම්වලට පාවිච්චි කළොත් තමයි ප්‍රශ්නය. ඒ ප්‍රශ්නය අහනකොට තමයි උදේ අපට අහන්න ඉඩ ලබාදුන්නෙ නැත්තෙ.
2024 ඔක්තෝබර් – බිලියන 58.7
2024 නොවැම්බර් – බිලියන 78.3
2024 දෙසැම්බර් – බිලියන 234.8
2025 ජනවාරි – බිලියන 117.4
2025 පෙබරවාරි – බිලියන 104.7
2025 මාර්තු බිලියන – 233.9
2025 අප්‍රේල් – බිලියන 154.2
2025 මැයි – බිලියන 33.6
2025 ජුනි – බිලියන 210.3
2025 ජුලි – බිලියන 151
2025 අගෝස්තු – දැනට බිලියන 51
මේකෙන් දැනට වත්කමක් සහිතව කොහොමද මේක ගෙනියන්න පුළුවන් වෙන්නෙ ?”
රවී කරුණානායක මහතා මේ බව පැවසුවේ ඊයේ (19) පාර්ලිමේන්තුව අමතමිනි.
