ගෝල්ෆේස් හි පාරේ වෙළඳාන් කටයුතුවල නිරතවන වෙළෙඳුන් ඉවත්කර නිසි ක්‍රමවේදයක් යටතේ සෞඛ්‍ය ආරක්ෂිතව මහජන සෞඛ්‍ය පරීක්ෂකවරුන්ගේ අවසර ඇතිව වෙළඳාම් කටයුතු කිරීම අරමුණු කරගෙන ගාලු මුවදොර වෙළදුන් එම ස්ථානයෙන් ඉවත් කිරීමට ක්‍රියාමාර්ග ගෙන ඇත. ඒ අනුව අද දින පොලිසිය ගාලු මුවදොර වෙළදුන් ඉවත් කිරීමට පැමිණියත් පොලිසිය සහ ගාලුමෝදර වෙළඳුන් අතර ඇති වූ සාකච්ඡාවකින් අනතුරුව ඉරිදා දක්වා ගෝල්ෆේස්හි එම වෙළෙඳුන්ට වෙළෙඳාම් කටයුතු කිරීමට අවසර ලබා දුන් අතර සඳුදා වෙළඳුන්ගෙන් 6 දෙනෙක් අමාත්‍යාංශය සමඟ සාකච්ඡා කර ඉදිරියේදී සිදු කරන පියවර පිළිබඳ තීරණයක් ගැනීමට නියමිතයි.කෙසේ වෙතත් වෙළඳුන් ප්‍රකාශ කළේ අවුරුදු ගණනාවක් තිස්සේ වෙළඳාම් කටයුතු කරමින් තම පවුල් නඩත්තු කරන අපි මහජන පරීක්ෂකවරුන්ගේ සහතික ලබාගන්නැයිි කියා මෙම ස්ථානයෙන් ඉවත් කිරීමට සැරසෙන බවයි. නමුත් මෙම ස්ථානයෙන් කඩ ඉවත් කර ගැනීමට එම වෙළදුන් අකමැත්ත ප්‍රකාශ කර ඇත. මෙම ස්ථානයේ කොළඹ මහ නගර සභාවේ සීමා තුළ පමණක් ලියාපදිංචි වෙළඳුන් PHI CERTIFICATE ලබාගත් වෙළඳුන්ට පමණක් ඉදිරියේදී වෙළෙඳාම් කටයුතු කිරීමට ලබාදීම තුළින් කූට ලෙස තමන් එම ස්ථානයෙන් ඉවත් කිරීමට සැරසෙන බව එම වෙළදුන් මැසිවිලි නගයි. එම ස්ථානයට පැමිණි වරාය කළමනාකරණ උපදේශන සේවා පුද්ගලික සමාගම ගාලුමුවදොර පරීක්ෂණ නිලධාරි සුරේෂ් ප්‍රනාන්දු මහතා මෙලෙස අදහස් දක්වා ඇත.
ගාලු මුවදොර ස්ථානය වරාය අධිකාරිය යටතේ වරාය කළමනාකරණය උපදේශන පෞද්ගලික සමාගම විසින් පාලනය කරන බවත් මෙම ස්ථානයේ වඩේ කරත්ත සහ වඩේ සම්බන්ධව තීරණයක් අරගෙන තියෙනවා සෞඛ්‍ය අමාත්‍යාංශයේ නිර්දේශ අනුව කරන්න ඒ අනුව මේ අයට පාරේ මේ විදියට කරන්න බැහැ, මේ අය හයදෙනෙකුට සාකච්ඡාවක් ලබාදීලා තියෙනවා. ඒ අනුව ඉදිරි තීරණය ගන්නවා..,කොහොමත් මෙතනින් මේ කඩ ඉවත් කරනවා,…..දැනට හදාගත්ත කෑම අලෙවි කිරීමට අවසර ලබා දෙන බවත් වැඩි දුරටත් ප්‍රකාශ කර ඇත.එමෙන්ම ඉරිදා දක්වා ඔවුන්ට කාලය ලබා දී ඇති බවද ඔහු වැඩි දුරටත් ප්‍රකාශ කර ඇත.

අද උදෑසන කඳාන ප්‍රදේශයේදී වෙඩි තැබීමක් සිදුවී ඇති බව සදහන් වේ.මෙම වෙඩි තැබීම හේතුවෙන් තුවාල ලැබූ පුද්ගලයන් දෙදෙනෙකු රෝහල්ගත කර ඇති බව පොලීසිය සඳහන් කරයි.යතුරුපැදියකින් පැමිණි පුද්ගලයින් දෙදෙනෙකු විසින් පොදු වෙළෙඳපොළ ආසන්නයේ මෝටර් රථයක සිටි පුද්ගලයින් දෙදෙනෙකුට වෙඩිතැබීමක් සිදුව ඇත.පොලිස් මාධ්‍ය ප්‍රකාශයක කාර්යාලය සඳහන් කළේ, වෙඩිතැබීමෙන් තුවාල ලැබූ පුද්ගලයින් දෙදෙනා මේ වනවිට රාගම රෝහලට ඇතුළත් කර ඇති බවයි.කඳාන ප්‍රදේශයේ සිදු වූ මෙම වෙඩි තැබීමෙන් තුවාල ලැබූ අයගෙන් එක් අයෙකු දිවංගත අමාත්‍ය මංගල සමරවීරගේ පෞද්ගලික ලේකම්වරයෙකු වූ සමීර මනහර මහතා බවත් එම වෙඩි තැබීමෙන් එක් අයෙකු ජීවිතක්ෂයට පත්ව ඇති බව පොලීසී ආරංචි මාර්ග ප්‍රකාශ කරයි.

ලෝක ආර්ථික සමුළුව (Global Economic Forum) වැනි ජාත්‍යන්තර මට්ටමේ සමුළුවකදී අමාත්‍ය සුනිල් හඳුන්නෙත්ති ඉංග්‍රීසි භාෂාවෙන් අදහස් දැක්වීම ‘විශාල අකරතැබ්බයක්’ බව ප්‍රවීණ දේශපාලන විචාරක මහාචාර්ය නිර්මාල් රංජිත් දේවසිරි පවසයි. වත්මන් ජාතික ජනබලවේගය (NPP) ආණ්ඩුව බලයට ගෙන ඒමට සහ එහි බලය තහවුරු කිරීමට ප්‍රබල දායකත්වයක් දුන් පුද්ගලයෙකු ලෙස ප්‍රකට මහාචාර්ය දේවසිරි, මෙම අදහස් පළ කර ඇත්තේ සිය යූටියුබ් නාලිකාවට එක් කළ වීඩියෝවක් මගිනි.

මහාචාර්ය දේවසිරි සිය අදහස් දැක්වීමේදී අවධාරණය කළේ,  ජයවර්ධනපුර විශ්වවිද්‍යාලයෙන් කළමනාකරණ උපාධියක් ලබා තිබුණද, ලෝක ආර්ථික සමුළුවකදී නැගෙන සංකීර්ණ ප්‍රශ්නවලට පිළිතුරු දීමට තරම් ‘පරිණත භාවයක්’ ඔහුට නොමැති බවයි.

ඔහු තවදුරටත් කියා සිටියේ, ආණ්ඩුවේ අවධානය යොමු වී ඇත්තේ රට තුළ බලය තහවුරු කර ගැනීමට පමණක් වන අතර, මෙවැනි ජාත්‍යන්තර වේදිකාවලදී රට නියෝජනය කිරීමේ වැදගත්කම පිළිබඳව ප්‍රමාණවත් සැලකිල්ලක් නොදක්වන බවයි. මෙම අවස්ථාවට හඳුන්නෙත්ති වෙනුවට ලක්මාලී හේමචන්ද්‍ර වැනි දක්ෂයෙකු යොමු කළේ නම් එය වඩාත් සුදුසු වන්නට ඉඩ තිබූ බවත්, එසේ නොමැති නම් පරිවර්තකයෙකුගේ සහය ලබාගෙන හෝ හඳුන්නෙත්ති අමාත්‍යවරයාට සභාව ඇමතීමට තිබූ බවත් මහාචාර්ය දේවසිරි අවධාරණය කළේය.

වර්තමානය වන විට ශ්‍රී ලංකාවේ පුනර්ජනනීය බලශක්ති ක්ෂේත්‍රය දැඩි ලෙස අනතුරට ලක්ව ඇති බව දේශීය ආයෝජකයෝ ප්‍රකාශ කරති. ඔවුන් පවසන පරිදි, රජය මෑතකදී ගත් ප්‍රතිපත්තිමය තීරණයක් හේතුවෙන් ,
දේශීය ආයෝජකයන්ගෙන් සමන්විත පුනර්ජනනීය බලශක්ති සංවර්ධකයන්ගේ සම්මේලනය අවධාරණය කරන්නේ පුනර්ජනනීය බලශක්ති ව්‍යාපෘති මගින් විදුලිය මිලදී ගැනීමේ ගාස්තු 30% කින් අඩු කිරීමට රජය ගත් එම තීරණය වහාම සමාලෝචනය කර, නව හා සාධාරණ මිල ක්‍රමයක් ස්ථාපිත කළ යුතු බවත් එසේ නොමැති වුවහොත් සමස්ත ක්ෂේත්‍රයම කඩා වැටීමට ලක්විය හැකි බවත් ය.

සම්මේලනයේ සභාපති තුසිත පීරිස් මහතා කියා සිටින්නේ, “විදුලිය මිලදී ගැනීමේ ගාස්තු කෘතිමව අඩුකර තිබෙන බවත්. පුනර්ජනනීය බලශක්ති ව්‍යාපෘති පවත්වාගෙන යන දේශීය ආයෝජකයන් විදියට අපිට තිබෙන ප්‍රශ්නය තමයි මෙම නව මිල තීරණය කළේ කොහොමද? කුමන පදනමකින්ද යන්න පිළිබඳව.” ඔහු වැඩිදුරටත් අවධාරණය කළේ, බැටරි බලශක්ති ගබඩා පද්ධති ජාතික විදුලි ජාලය සමග ඒකාබද්ධ කිරීමට ලංකා විදුලිබල මණ්ඩලයට තවමත් ඇති නොහැකියාව, සූර්ය බලශක්ති ක්ෂේත්‍රයේ වර්ධනයට සෘජු තර්ජනයක් වී ඇති බවයි. විදුලිබල මණ්ඩලය කරන කටයුතු කිසිදු අධීක්ෂණයට ලක් නොවීමෙන් බරපතළ ගැටලු රැසක් මතුව ඇති බවද පීරිස් මහතා පෙන්වා දෙයි.

විදුලි මිලදී ගැනීමේ ගාස්තු වහාම සංශෝධනය නොකර, බැටරි බලශක්ති ගබඩා පද්ධති ආනයනය සඳහා වන තීරු බදු සහ අනෙකුත් බදු සම්පූර්ණයෙන්ම රජය ඉවත් නොකළහොත්, මෙරට පුනර්ජනනීය බලශක්ති අංශයේ “මළගම” උදාවිය හැකි බවට තුසිත පීරිස් මහතා දැඩි අනතුරු ඇඟවීමක් කරයි. මෙම තත්ත්වය රටේ බලශක්ති සුරක්ෂිතභාවයට මෙන්ම පරිසර හිතකාමී අනාගතයටද සෘජුවම බලපෑ හැකි බැවින්, රජයේ කඩිනම් සහ ඵලදායී මැදිහත්වීමක් මේ මොහොතේ අත්‍යවශ්‍ය වී තිබේ.

රජයේ වෛද්‍ය නිලධාරීන්ගේ සංගමය (GMOA) තුළ සිය බලය තවදුරටත් තහවුරු කර ගනිමින්, වෛද්‍ය සංජීව තෙන්නකෝන් මහතා දෙවන වරටත් සංගමයේ සභාපති ලෙස තේරී පත් වී තිබේ. ඊයේ (ජූනි 28) පැවති සංගමයේ වාර්ෂික නිලවරණයේදී, වෛද්‍ය ප්‍රභාත් සුගතදාස මහතාද යළිත් වරක් ලේකම් ධුරයට පත් විය.

මෙම ජයග්‍රාහී සටනේදී, වෛද්‍ය සංජීව තෙන්නකෝන් සහ වෛද්‍ය ප්‍රභාත් සුගතදාස යන මහත්වරුන් නියෝජනය කළ පාර්ශ්වය, ඡන්ද 60%කට වැඩි ප්‍රමාණයක් ලබා ගනිමින්, දර්ශන සිරිසේන සහ හරිත අලුත්ගේ මහත්වරුන්ගේ පාර්ශ්වය පරාජය කිරීමට සමත් විය. මෙම ප්‍රතිඵලයත් සමඟින්, GMOA හි නායකත්වයේ අඛණ්ඩ පැවැත්මක් සනිටුහන් වන අතර, වෛද්‍ය ප්‍රජාව තුළ ඔවුන්ගේ ප්‍රතිපත්ති සහ ඉදිරි දැක්ම කෙරෙහි පවතින විශ්වාසය ඉස්මතු වී ඇත.

කච්චතිව් දූපත රාජ්‍ය තාන්ත්‍රිකව ශ්‍රී ලංකාවට හිමි වී ඇති බැවින්, එය කිසිම හේතුවක් යටතේ වෙනත් පාර්ශ්වයකට පවරා නොදෙන බව ධීවර හා ජලජ සම්පත් අමාත්‍ය රාමලිංගම් චන්ද්‍රසේකරන් මහතා අවධාරණය කරයි. අමාත්‍යවරයා පෙන්වා දෙන්නේ, ඉන්දීය ධීවරයින් විසින් ශ්‍රී ලංකාවේ උතුරු මුහුදු තීරයේ සිදු කරන අනවසර මසුන් ඇල්ලීම හේතුවෙන් එම ප්‍රදේශයේ ධීවර සම්පත සීඝ්‍රයෙන් විනාශ වෙමින් පවතින බවයි. මෙම ප්‍රකාශය සිදු කර ඇත්තේ, හදිසි අවස්ථාවක් යටතේ ශ්‍රී ලංකාව සමග ඇතිකරගත් ගිවිසුමක් හේතුවෙන් ඉන්දීය ධීවරයින්ට ශ්‍රී ලංකා මුහුදු තීරයේ මසුන් ඇල්ලීමට තිබූ අයිතිවාසිකම් උල්ලංඝනය වී ඇති බවට ඉන්දීය විදේශ අමාත්‍ය එස්. ජයශංකර් මහතා එරට පැවැති උත්සවයකදී සිදුකළ ප්‍රකාශයක් සම්බන්ධයෙන් අදහස් දක්වමිනි. මෙහිදී අමාත්‍ය චන්ද්‍රසේකරන් මහතා වැඩිදුරටත් පැවසුවේ, ඉන්දියාවේ මැතිවරණ කාලසීමාවන්හිදී කච්චතිව් දූපත සහ ඉන්දීය ධීවරයින් පිළිබඳ නොයෙකුත් කතා එරට දේශපාලන වේදිකාවන්හිදී නිරන්තරයෙන් මතුවන බවයි. මෙම තත්ත්වය, කච්චතිව් ගැටලුව ඉන්දීය දේශපාලනයේ මැතිවරණ ප්‍රචාරක අවියක් බවට පත්ව ඇති බවට ඉඟි කරන අතර, ශ්‍රී ලංකාව තම ස්වෛරීභාවය ආරක්ෂා කර ගැනීමටත්, තම මුහුදු සම්පත් සුරක්ෂිත කිරීමටත් දැඩි අධිෂ්ඨානයකින් කටයුතු කරන බව අමාත්‍යවරයාගේ ප්‍රකාශයෙන් පැහැදිලි වේ.

එහිදී වැඩිදුරටත් අදහස් දැක්වූ ධීවර හා ජලජ සම්පත් අමාත්‍ය රාමලිංගම් චන්ද්‍රසේකරන් මහතා,

“නීතිවිරෝධීව පැමිණෙන ඉන්දීය ධීවරයින් විසින් අපේ මුහුදු සම්පත සම්පූර්ණයෙන්ම විනාශ කරමින් තියෙනවා. අද උතුරු පළාතේ ගත්තාම 30%කට වැඩි ප්‍රමාණයක් මේ මුහුදු රස්සාවෙන් ජීවත්වෙන පිරිස්. අන්න ඒ අයගේ ජීවිතේ තමයි විනාශ කරමින් තියෙන්නේ.

වෙන කවුරුත් යටතේ නෙමෙයි ඉන්දීය තමිල්නාඩු රජය යටතේ ඉන්න තමිල්නාඩු ධීවරයින් තමයි මේ වැඩේ කරන්නේ. විශේෂයෙන් ඉන්දියාවේ මැතිවරණයක් එනකොට ඒ ගොල්ලෝ හැමදාම ගන්න ආයුධය තමයි කච්චතිව් ලංකාවට දුන්න එක වැරදියි, කච්චතිව් නැවත අපි ලබා ගන්නවා. වගේ කියන කතා…

තමිල්නාඩු ධීවරයින් සිදුකරන මේ විනාශය මේ මුහුදු තීරයේ දිගටම සිද්ධ වුණොත් තව අවුරුදු 20කින් විතර අපේ මුහුදු සීමාව මුහුදු කාන්තාරයක් බවට පරිවර්ථනය වෙනවා. ඒක වළක්වන්න බෑ.”

                                                                                                                                                                                                 නීල් සුනේත්‍රරාල් පානදුර ප්‍රාදේශීය සභාවේ සිය මන්ත්‍රී ධූරයෙන් ඊයේ ( 27 ) ඉල්ලා අස්වී තිබේ . ඔහු සර්වජන බලයේ සියලු තනතුරු වලින්ද ඉල්ලා අස්විය .

සර්වජන බලය ජනතා විමුක්ති පෙරමුණට සහයෝගය නොදක්වන බවට පක්ෂයේ සභිකයන් කතිකා කරගත්තද වරප්‍රසාද මන්ත්‍රී ධූර සඳහා ඉදිරිපත් වූ තිදෙනාගෙන් දෙදෙනෙක් මුදලට මාලිමාවට සහයෝගය දක්වා තිබේ .

මෙම හේතුව නිසා සර්වජන බලයේ සියලූම සභිකයන් මාලිමාවට සහාය දක්වන බවට පැතිර යන කටකතා හේතුවෙන් නීල් සුනේත්‍රලාල් මෙසේ ඉල්ලා අස්වූ බව සඳහන්වේ .

එක්සත් ජාතීන්ගේ මානව හිමිකම් පිළිබඳ මහ කොමසාරිස් වෝල්කර් ටර්ක් මහතාගේ මෑතකාලීන ශ්‍රී ලංකා සංචාරය සම්බන්ධයෙන් ජාතික නිදහස් පෙරමුණේ නායක විමල් වීරවංශ මහතා දැඩි විවේචනයක් එල්ල කරයි. ටර්ක් මහතා මෙරටට පැමිණියේ “එල්.ටී.ටී.ඊ. හිතවාදීන්ගේ අවශ්‍යතාවලට අනුව සකස් කරන ලද මානව හිමිකම් වාර්තාවක්” ඉදිරි ජිනීවා මානව හිමිකම් කොමිෂන් සභාවට ඉදිරිපත් කිරීමේ අරමුණින් බව ඔහු චෝදනා කරයි.
කොළඹදී පැවති මාධ්‍ය හමුවකට එක්වෙමින් වීරවංශ මහතා ප්‍රකාශ කළේ, ආණ්ඩු පක්ෂයට හෝ විපක්ෂයට මේ පිළිබඳව කිසිදු තැකීමක් නොමැති බවයි. විපක්ෂය මේ පිළිබඳව කතා නොකරන්නේ ඔවුන්ගේ කටවලට “ජිනීවා පිට්ටු හිර වී” ඇති නිසා බවට ද ඔහු උපහාසාත්මකව සඳහන් කළේය. රටේ “කොන්ද පණ නැති රතු වස්ත්‍රධාරී ආණ්ඩුවක්” පවතින බැවින් ඔවුන් මේ පිළිබඳව කිසිවක් රටට නොපවසන බව ද ඔහු වැඩිදුරටත් කියා සිටියේය.
එක්සත් ජාතීන්ගේ මානව හිමිකම් කොමසාරිස්වරයෙකු සාමාන්‍යයෙන් ශ්‍රී ලංකාවේ සංචාරය කරන්නේ යම්කිසි තීරණාත්මක සිදුවීමක් සිදුවීමට පෙර බව පෙන්වා දුන් වීරවංශ මහතා, ටර්ක් මහතා මෙම සංචාරයේදී සිදුකළ ප්‍රකාශ ඉතා බරපතළ බව අවධාරණය කළේය. මෙවර සංචාරයේදී වෝල්කර් ටර්ක් හමුවී ඇත්තේ දෙමළ බෙදුම්වාදී අදහස් දරන්නන් පමණක් බව ඔහු පෙන්වා දෙයි.

යුද්ධයට නායකත්වය දුන් හමුදා ප්‍රධානීන්, නීතිඥ සංවිධාන සහ ජාතික සංවිධාන ටර්ක් මහතා හමුවීමට අවස්ථාව ඉල්ලා සිටිය ද, එම කිසිදු ඉල්ලීමක් ඔහු නොසලකා හැර ඇති බවත්, නමුත් පැලවත්තේ සිටින “රතු වස්ත්‍රධාරී ටිල්වින් සිල්වා” මහතාව ඉතා කැමැත්තෙන් ගොස් හමු වී ඇති බවත් වීරවංශ මහතා චෝදනා කළේය.
වෝල්කර් ටර්ක්ගේ මූලික අභිප්‍රායක් වන්නේ ශ්‍රී ලංකාව තුළ ස්වාධීන අභිචෝදක කාර්යාලයක් පිහිටුවීම සහ සත්‍ය සෙවීමේ කොමිසමක් පිහිටුවීම බව විමල් වීරවංශ මහතාගේ අදහසයි. ඒ අනුව, යුද්ධය නිමා කළ හමුදා සෙබළුන් හා ඊට දායක වූ පිරිස් කොටු කිරීම එහි අරමුණ බව ඔහු පවසයි. මෙම අභිචෝදක කාර්යාලය “කොටි අභිචෝදක කාර්යාලයක්” ලෙස හැඳින්විය හැකි බව ද ඔහු සඳහන් කළේය.

යුද්ධය පැවති සමයේ උතුරේ හා දකුණේ බොහෝ පිරිස් මියගිය බවත්, නමුත් එක්සත් ජාතීන්ගේ මානව හිමිකම් කොමසාරිස්වරයාට දෙමළ බෙදුම්වාදීන් පෙන්වීමට උත්සාහ කරන්නේ උතුරේ සාමාන්‍ය ජනයා පමණක් යුද්ධයෙන් මියගිය බවට බවත්, ඔහු තවදුරටත් චෝදනා කළේය.

හිටපු සෞඛ්‍ය අමාත්‍ය කෙහෙළිය රඹුක්වැල්ලට එරෙහිව අද (ජුනි 26) දෙවැනි නඩුවක් ගොනු කරමින්, මුදල් විශුද්ධිකරණය වැළැක්වීමේ පනත යටතේ ඔහුගේ බිරිඳ, දියණියන් තිදෙනා සහ බෑනා ඇතුළු පවුලේ සාමාජිකයන්ට එරෙහිව ද අල්ලස් හෝ දූෂණ චෝදනා විමර්ශන කොමිෂන් සභාව (CIABOC) විසින් කොළඹ මහාධිකරණය හමුවේ අධිචෝදනා ගොනු කර තිබේ. මෙම නව අධිචෝදනා පත්‍රය චෝදනා 43කින් සමන්විත වේ.

මේ අනුව, අද දිනයේ පමණක් කෙහෙළිය රඹුක්වැල්ලට එරෙහිව නඩු දෙකක් ගොනු වී ඇත. පළමු නඩුව, ප්‍රමිතියෙන් තොර ප්‍රතිදේහ එන්නත් මිලදී ගැනීමේ සිදුවීම සම්බන්ධයෙන් වන අතර, එහිදී ඔහු ඇතුළු විත්තිකරුවන් 12 දෙනෙකුට එරෙහිව නීතිපතිවරයා විසින් කොළඹ ස්ථිර ත්‍රිපුද්ගල මහාධිකරණය හමුවේ අධිචෝදනා 13ක් ගොනු කරනු ලැබීය. මෙම අධිචෝදනා ගොනු කිරීම සිදුවූයේ මහාධිකරණ විනිසුරුවන් වන මහේන් වීරමන්, අමාලි රණවීර සහ ප්‍රදීප් අබේරත්න යන ත්‍රිපුද්ගල විනිසුරු මඩුල්ල හමුවේය.

පසුගිය ජූනි 19 වැනිදා මාලිගාකන්ද මහේස්ත්‍රාත් අධිකරණයට අවසන් වරට විමර්ශනවල ප්‍රගතිය වාර්තා කරමින් නියෝජ්‍ය සොලිසිටර් ජනරාල් ලක්මිණි ගිරිහාගම මෙනවිය කියා සිටියේ, ප්‍රමිතියෙන් තොර ප්‍රතිදේහ එන්නත් සිදුවීම සම්බන්ධයෙන් අපරාධ පරීක්ෂණ දෙපාර්තමේන්තුව සිදුකළ වසරකුත් මාස 8යි දින 6ක විමර්ශන මේ වන විට අවසන් කර ඇති බවයි.