ඕස්ට්‍රේලියානු අග්‍රාණ්ඩුකාර සමන්තා ජෝයි මොස්ටින් (Samantha Joy Mostyn) මහත්මිය ඊයේ (08) පස්වරුවේ ජනාධිපති කාර්යාලයේ දී ජනාධිපති අනුර කුමාර දිසානායක මහතා හමු වී ද්වීපාර්ශ්වික සාකච්ඡා පැවැත්වීය.

ඕස්ට්‍රේලියාව සහ ශ්‍රී ලංකාව අතර වසර 75කට වඩා වැඩි මිත්‍රත්වය තවදුරටත් ශක්තිමත් කිරීම සහ දෙරටේ අන්‍යෝන්‍ය ප්‍රතිලාභ සඳහා පවතින සහයෝගිතා ක්ෂේත්‍ර පුළුල් කිරීමේ අවස්ථා පිළිබඳ මෙහිදී දීර්ඝ වශයෙන් සාකච්ඡා කෙරිණි.

ඕස්ට්‍රේලියානු අග්‍රාණ්ඩුකාර සමන්තා ජෝයි මොස්ටින් මහත්මිය මෙහිදී අවධාරණය කළේ ජනාධිපති අනුර කුමාර දිසානායක මහතාගේ පැහැදිලි නායකත්වය යටතේ සාර්ථක ගමනකට අවශ්‍ය අඛණ්ඩ සහයෝගය ලබා දීමට ඕස්ට්‍රේලියාව සූදානම් බවයි.

විශේෂයෙන් ශ්‍රී ලංකාවේ ආර්ථිකය ශක්තිමත් කිරීම වෙනුවෙන් අවශ්‍ය සහාය ලබා දීමට ඕස්ට්‍රේලියාව සූදානම් බව අග්‍රාණ්ඩුකාරවරිය විසින් අවධාරණය කරන ලදී.

මෙම සංචාරයෙන් ඕස්ට්‍රේලියාව සහ ශ්‍රී ලංකාව අතර මිත්‍රත්වය තවදුරටත් ශක්තිමත් වන බව සඳහන් කළ ජනාධිපතිවරයා, සුනාමි ව්‍යසනයේදී මෙන්ම ශ්‍රී ලංකාව මුහුණ දුන් ආර්ථික අර්බුදයේදීද ඕස්ට්‍රේලියානු රජය සෘජුව මෙන්ම, ජාත්‍යන්තර ආයතන හරහා ලබා දුන් සහයෝගය සිහිපත් කර සිටියේය. එසේම, ශ්‍රී ලංකාවේ ආර්ථික, අධ්‍යාපන, ආරක්ෂක, සංචාරක, සමුද්‍රීය කටයුතුවලදී ඕස්ට්‍රේලියාවෙන් ලැබෙන සහායද ජනාධිපතිවරයා මෙහිදී අගය කළේය.

ඕස්ට්‍රේලියාව, ශ්‍රී ලංකාවේ විශාල පිරිසකගේ රැකියා, අධ්‍යාපනය සහ වෘත්තීය පුහුණු ආදිය සඳහා මධ්‍යස්ථානයක් බවට පත් වී ඇති බව පැවසූ ජනාධිපතිවරයා මෙම ක්ෂේත්‍රවල ඕස්ට්‍රේලියානු අත්දැකීම්වලින් ශ්‍රී ලංකාවට බොහෝ දේ ඉගෙන ගත හැකි බවත්, එම අත්දැකීම් සාර්ථකව බෙදා ගැනීමට ශ්‍රී ලංකාව අපේක්ෂා කරන බවත් වැඩිදුරටත් පැවසීය.

ඕස්ට්‍රේලියානු ආයෝජකයන් සඳහා ශ්‍රී ලංකාවේ ඉතාම හිතකර පරිසරයක් නිර්මාණය වී ඇති බවද මෙහිදී ජනාධිපතිවරයා අවධාරණය කළේය.

ජනාධිපති අනුර කුමාර දිසානායක මහතාගේ ආරාධනයකට අනුව තෙදින නිල සංචාරයක් සඳහා අගෝස්තු 06දා පස්වරුවේ ශ්‍රී ලංකාවට පැමිණි ඕස්ට්‍රේලියානු අග්‍රාණ්ඩුකාරවරිය දිවයිනේ විවිධ ප්‍රදේශවල සංචාරය කිරීමටත්, බණ්ඩාරගම, මිරිස්ස සහ වැලිගම යන ප්‍රදේශවල ක්‍රියාත්මක වන ඕස්ට්‍රේලියාව විසින් සහාය දක්වනු ලබන ව්‍යාපෘති කිහිපයක් නිරීක්ෂණය කිරීමටත් නියමිතය.

@PMD

නිකිණි පුර පසලොස්වක පෝය දිනය අදට යෙදී තිබේ. සම්බුදු හිමිගේ උපස්ථායකත්වය දැරූ උතුම් ආනන්ද හිමි රහත් භාවයට පත්වීම ඇතුළු ශාසනික වශයෙන් ඓතිහාසික සිදුවීම් ගණනාවක් සිදුවීම නිසා නිකිණි පොහොය ලොව මහත් බෞද්ධ ජනතාව ඉතා උනන්දුවෙන් සමරනු ලැබේ.

ප්‍රථම ධර්ම සංගායනාව පැවැත්වීම, පෙර වස් මගහැරි භික්ෂූන් වහන්සේ පසුවස් එළඹීම මෙන්ම බුදුන්වහන්සේගේ ලලාට ධාතු තැන්පත් කරමින් සේරුවිල දා ගැබ තැනීම ආරම්භ කිරීම ඇතුළු සාසනික කරුණු ගණනාවක් මෙම පුන් පොහොය හා බැදී ඇත.

හිටපු අමාත්‍ය රාජිත සේනාරත්න මහතා අල්ලස් චෝදනාවක් සම්බන්ධයෙන් අපේක්ෂිත ඇප ඉල්ලා ඉදිරිපත් කළ පෙත්සම විභාග කිරීම සැප්තැම්බර් 01 වන දින දක්වා කල් තැබීමට කොළඹ මහාධිකරණය අද (අගෝස්තු 7) නියෝග කළේය.

මෙම පෙත්සම අද දින කොළඹ මහාධිකරණ විනිසුරු ඉන්ද්‍රිකා කාලිංගවංශ මහත්මිය ඉදිරියේ කැඳවූ අවස්ථාවේදී, අල්ලස් කොමිසම වෙනුවෙන් පෙනී සිටි සහකාර අධ්‍යක්ෂිකා සුලෝචනා හෙට්ටිආරච්චි මහත්මිය ප්‍රකාශ කළේ නඩුකරයට අදාළ නොතීසි තම කොමිසමට නොලැබුණු බවයි. ඇය වැඩිදුරටත් සඳහන් කළේ ලැබුණු තොරතුරු මත පමණක් අද දින අධිකරණයට පැමිණි බවයි.

පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න මහතා කියා සිටියේ, නොතීසි නිසි පරිදි භාර දී තිබුණත් යම් අතපසුවීමක් සිදුවන්නට ඇති බවයි. කෙසේ වෙතත්, අල්ලස් කොමිසමේ නිලධාරීන් අධිකරණයට පැමිණ සිටින බැවින් පෙත්සම අද දින සලකා බැලිය හැකි බවට ඔහු කරුණු දැක්වීය.

නමුත් මහාධිකරණ විනිසුරුවරිය තීරණය කළේ, නොතීසි නිසියාකාරව නිකුත් කිරීමකින් තොරව පෙත්සම විභාග කළ නොහැකි බවයි. ඒ අනුව, ඇය පෙත්සම සැප්තැම්බර් 01 දිනට කල් තැබූ අතර, එදිනට පෙර අල්ලස් කොමිසම වෙත නොතීසි නිකුත් කරන ලෙස නියෝග කළාය.

හිටපු ධීවර අමාත්‍යවරයා ලෙස කිරින්ද ධීවර වරායේ වැලි කැණීම් කටයුතු කොරියානු සමාගමකට පැවරීමෙන් රජයට රුපියල් ලක්ෂ 262කට අධික පාඩුවක් සිදුකළ බවට රාජිත සේනාරත්න මහතාට අල්ලස් කොමිසම විසින් චෝදනා එල්ල කර ඇත. මෙම චෝදනා සම්බන්ධයෙන් ඔහු අත්අඩංගුවට ගැනීමට පෙර අපේක්ෂිත ඇපයක් ඉල්ලා කොළඹ ප්‍රධාන මහෙස්ත්‍රාත් අධිකරණයට ඉදිරිපත් කළ පෙත්සම ප්‍රතික්ෂේප වීමෙන් අනතුරුව, මහෙස්ත්‍රාත් අධිකරණයේ තීන්දුව ප්‍රතිශෝධනය කර අපේක්ෂිත ඇප නියම කරන ලෙස ඉල්ලා ඔහු කොළඹ මහාධිකරණයට මෙම පෙත්සම ඉදිරිපත් කර තිබේ.

අභියාචනාධිකරණයේ නඩු ගොනුවක පිටු අනීතික ලෙස ඉරා ඉවත් කිරීමේ චෝදනාවට වරදකරු වූ නීතිඥ ඩබ්ලිව්.ඩී. ධර්මසිරි කරුණාරත්නගේ නීතිඥභාවය අහෝසි කිරීමට ශ්‍රේෂ්ඨාධිකරණය ඊයේ (6) නියෝග කළේය.

අගවිනිසුරු ප්‍රීති පද්මන් සූරසේන, කුමුදුනි වික්‍රමසිංහ සහ අචල වෙංගප්පුලි යන ශ්‍රේෂ්ඨාධිකරණ විනිසුරුවරුන්ගෙන් සමන්විත ත්‍රිපුද්ගල විනිසුරු මඬුල්ලක් විසින් මෙම තීන්දුව ප්‍රකාශයට පත් කරන ලදී.

අභියාචනාධිකරණයේ ලේඛකාධිකාරීවරයා විසින් මරදාන පොලිසියට කරන ලද පැමිණිල්ලකට අනුව, අදාළ නීතිඥවරයා අභියාචනාධිකරණයේ ලේඛනාගාරයට පිවිස නඩු ගොනුවකින් පිටු දෙකක් ඉරා ඉවත් කර ඇති බවට චෝදනා එල්ල විය.

මෙම චෝදනා සම්බන්ධයෙන් විභාගයක් පැවැත්වීමෙන් අනතුරුව තීන්දුව ප්‍රකාශයට පත් කළ අගවිනිසුරුවරයා, නීතිඥවරුන් ලෙස පිළිගෙන බඳවා ගන්නේ හොඳ කීර්තියක්, දක්ෂ දැනුමක් සහ හැකියාවක් ඇති පුද්ගලයන් පමණක් බව අවධාරණය කළේය. නීතිඥයෙකුට අපේක්ෂිත ප්‍රමිතීන් පවත්වා ගැනීමට නොහැකි නම්, ඔහුට තවදුරටත් එම තනතුරේ කටයුතු කිරීමට අවසර දිය නොහැකි බවත්, මෙම ක්‍රියාව සමස්ත නීති වෘත්තියේ කීර්ති නාමයට විශාල කැළලක් බවත් අගවිනිසුරුවරයා සිය තීන්දුවේ සඳහන් කර තිබිණි.

ඒ අනුව, අධිකරණ සංවිධාන පනතේ 42 වන වගන්තිය ප්‍රකාරව වගඋත්තරකාර නීතිඥවරයා වහාම නීතිඥභාවයෙන් ඉවත් කිරීමට ශ්‍රේෂ්ඨාධිකරණය නියෝග කළේය. මෙම තීන්දුව අනුව කටයුතු කර අවශ්‍ය ඉදිරි පියවර ගන්නා ලෙස ශ්‍රේෂ්ඨාධිකරණ විනිසුරු මඬුල්ල එහි රෙජිස්ට්‍රාර්වරයාට වැඩිදුරටත් නියෝග කළේය

ඩොනල්ඩ් ට්‍රම්ප්ගේ බදු ප්‍රතිපත්තිය යටතේ පැනවූ නව තීරුබදු අද (07) සිට ක්‍රියාත්මක වේ.ඒ අනුව මෙරටින් ආනයනය කරනු ලබන භාණ්ඩ සඳහා 20%ක තීරුබද්දක් අද සිට අයකරනු ඇති.

අමෙරිකාව භාණ්ඩ ආනයනය කරනු ලබන රටවල් සඳහා නව තීරුබදු හඳුන්වාදුන් අතර එහිදි ශ්‍රී ලංකාවට 44%ක තීරු බදු ප්‍රතිශතයක් පනවා තිබුණි.

එම බදු ප්‍රතිශතය ක්‍රියාත්මක වුවහොත් එය මෙරට ආර්ථිකයට දැඩි බලපෑමක් එල්ල විය හැකි බැවින් ඉන් සහනයක් ලබාගැනීම සඳහා ශ්‍රී ලංකා රජය අමෙරිකානු බලධාරීන් සමග සාකච්ඡා වට කිහිපයක් පවත්වනු ලැබීය.

එම සාකච්ඡාවලින් 24%ක ඉහළ තීරුබදු ප්‍රතිශතයක් අඩු කරගැනීමට මෙරට නියෝජිතයින් සමත් වීමත් සමග ශ්‍රී ලංකාව සඳහා පනවනු ලැබු තීරුබදු ප්‍රතිශතය 20%ක් වේ.

කෙසේවෙතත් මෙම නව බදු ප්‍රතිපත්තිය පසුගිය පළමු වැනිදා සිට ක්‍රියාත්මක වීමට නියමිතව තිබුණ ද අමෙරිකානු ජනාධිපතිවරයා විසින් එය අද දිනය දක්වා කල් දමනු ලැබීය.

මේ අතර අමෙරිකාව පනවා ඇති තීරුබදු ප්‍රතිශතය තවදුරටත් අඩුකර ගැනීම සඳහා සාකච්ඡා කිරීමට නියමිත බව ශ්‍රී ලංකා අපනයන සංවර්ධන මණ්ඩලයේ සභාපති මංගල විජේසිංහ මහතා පවසයි.

අමෙරිකාව පනවා ඇති තීරුබදු සඳහා මුහුණ දීමේදී ගත යුතු ඉදිරි ක්‍රියාමාර්ග සහ සැලසුම් සම්බන්ධයෙන් අපනයන සංවර්ධන මණ්ඩලයේ දී විශේෂ සාකච්ඡාවක් පැවැත්විය.

SupremeSAT සන්නිවේදන චන්ද්‍රිකා ව්‍යාපෘතිය සඳහා ශ්‍රී ලංකා රජය කිසිදු මුදලක් ආයෝජනය කර නොමැති බව අග්‍රාමාත්‍ය ආචාර්ය හරිනි අමරසූරිය මහත්මිය පාර්ලිමේන්තුවේදී පැවසුවාය. විපක්ෂය විසින් යොමුකළ ප්‍රශ්නයකට පිළිතුරු දෙමින් අගමැතිනිය මේ බව සඳහන් කළේය.

අග්‍රාමාත්‍යවරිය පැහැදිලි කළේ, SupremeSAT සමාගම 2012 වසරේදී ශ්‍රී ලංකා ආයෝජන මණ්ඩලය (BOI) සමඟ ගිවිසුමකට එළඹුණු බවයි. එම ගිවිසුම යටතේ, සමාගම විසින් 2013-2014 කාලය තුළ සන්නිවේදන චන්ද්‍රිකාව සඳහා රුපියල් මිලියන 12.1ක් ආයෝජනය කර ඇත. ආයෝජන අයදුම්පතට අනුව, මෙම ව්‍යාපෘතිය සඳහා රජයේ මුදල් ආයෝජනයක් සිදු වී නොමැත.

එමෙන්ම, මහනුවර කාර්මික උද්‍යානයේ චන්ද්‍රිකා පද්ධතියක් පිහිටුවීම සඳහා Supreme SHST පෞද්ගලික සමාගම රුපියල් මිලියන 1,828ක ආයෝජනයක් සිදු කර ඇති බවත්, ඒ සඳහා ද BOI සමඟ ගිවිසුමක් ඇති බවත් අගමැතිනිය ප්‍රකාශ කළාය.

ආයෝජන මණ්ඩලයේ වාර්තා අනුව, SupremeSAT සමාගම විසින් ශ්‍රී ලංකාවට ලබාදුන් මූල්‍ය ප්‍රතිලාභ පහත පරිදි බවද අගමැතිනිය පෙන්වා දුන්නාය:

2015-2016: රුපියල් මිලියන 19,617

2016-2017: රුපියල් මිලියන 28,133

2017-2018: රුපියල් මිලියන 29,106

2018-2019: රුපියල් මිලියන 34,169

2019-2020: රුපියල් මිලියන 42,960

2020-2021: රුපියල් මිලියන 62,545

2021-2022: රුපියල් මිලියන 87,789

2023 පළමු මාස හය: රුපියල් මිලියන 39,590

නීති විරෝධී ලෙස එකලස් කරන ලද රුපියල් කෝටි 3කට ආසන්න වටිනාකමකින් යුත් සුඛෝපභෝගී වාහනයක් ගරාජයක තිබී වලානේ මධ්‍යම දූෂණ මර්දන ප්‍රහාරක බලකාය විසින් අත්අඩංගුවට ගෙන තිබේ.

වලානේ මධ්‍යම දූෂණ මර්දන ප්‍රහාරක බලකායේ ස්ථානාධිපති ප්‍රධාන පොලිස් පරීක්ෂක ඉන්දික වීරසිංහ මහතාට ලැබුණු තොරතුරක් මත, පොලිස් අධිකාරී කේ.ඒ. උදය කුමාර මහතාගේ සැලසුමක් අනුව මෙම වැටලීම සිදු කර ඇත.

අත්අඩංගුවට ගත් මෙම ව්‍යාජ ලෙස සකස් කරන ලද ටොයෝටා ලෑන්ඩ් කෲසර් ප්‍රාඩෝ වර්ගයේ ජීප් රථය, වැඩිදුර විමර්ශන කටයුතු සඳහා ගනේමුල්ල පොලිසිය වෙත භාර දී තිබේ.

2015 ජනාධිපතිවරණ සමයේ කැරම් බෝඩ් සහ දාම් ලෑලි බෙදා හැරීම සම්බන්ධයෙන් සිර දඬුවම් ලබන හිටපු අමාත්‍යවරුන් වන මහින්දානන්ද අලුත්ගමගේ සහ නලින් ප්‍රනාන්දුට එරෙහි නඩුවට අදාළ ලේඛන අධිකරණයට ඉදිරිපත් කරන ලෙස කොළඹ මහාධිකරණය අද (06) අපරාධ පරීක්ෂණ දෙපාර්තමේන්තුවට (CID) නියෝග කළේය.

මෙම නඩුව අද කැඳවූ අවස්ථාවේදී, නීතිපතිවරයා විසින් ගොනු කරන ලද චෝදනා සලකා බලමින්, අධිකරණය විසින් මෙම නියෝගය නිකුත් කරන ලදී. සතොස ආයතනය හරහා කැරම් බෝඩ් 14,000ක් සහ දාම් ලෑලි 11,000ක් ආනයනය කර එවක ජනාධිපති අපේක්ෂක මහින්ද රාජපක්ෂ මහතාගේ දේශපාලන කාර්යාලවලට බෙදා හැරීමෙන් රජයට පාඩුවක් සිදු කළ බවට ඔවුන්ට චෝදනා එල්ල වී තිබේ.

අද දින නඩුවට අදාළව මහින්දානන්ද අලුත්ගමගේ සහ නලින් ප්‍රනාන්දු මෙන්ම, මෙම සිද්ධියට සම්බන්ධ බවට චෝදනා ලැබ ඇප මත මුදාහැර සිටින ක්‍රීඩා අමාත්‍යාංශයේ හිටපු ලේකම් විශ්‍රාමික මේජර් ජෙනරාල් නන්ද මල්ලවාරච්චි ද අධිකරණයේ පෙනී සිටියේය.

ලැයිස්තුගත කර ඇති ලේඛන හෝ ඒවායේ මුල් පිටපත් CID සතුව තිබේ නම්, ඒවා අද සිට සතියක් ඇතුළත අධිකරණයේ රෙජිස්ට්‍රාර් වෙත ඉදිරිපත් කරන ලෙස කොළඹ මහාධිකරණය නියෝග කළ බව සඳහන් වේ.

මේ වසරේ ගත වූ කාලය තුළ වාහන ලියාපදිංචිය ඉහළ ගොස් ඇති බව මෝටර් රථ ප්‍රවාහන දෙපාර්තමේන්තුව පවසයි. ඒ අනුව, වාහන එක් ලක්ෂ 33,678ක් ලියාපදිංචි කර තිබේ.

මෙලෙස ලියාපදිංචි කර ඇති වාහන අතරින් වැඩිම සංඛ්‍යාවක් යතුරුපැදි වන අතර, එම සංඛ්‍යාව එක් ලක්ෂ 451ක් ලෙස දැක්වේ.

මීට අමතරව, මෝටර් රථ 20,535ක්, ත්‍රිරෝද රථ 3,293ක් සහ ද්විත්ව කාර්ය වාහන 1,995ක් ද අදාළ කාලය තුළ ලියාපදිංචි කර ඇත.

රජය විසින් වාහන ආනයනය සඳහා අවසර දීම මෙම ලියාපදිංචි සංඛ්‍යාව ඉහළ යෑමට ප්‍රධාන හේතුව බව මෝටර් රථ ප්‍රවාහන දෙපාර්තමේන්තුව වැඩිදුරටත් සඳහන් කළේය.

පුපුරණ ද්‍රව්‍ය තොගයක් නීතිවිරෝධී ලෙස සන්තකයේ තබාගෙන සිටි 78 හැවිරිදි පුද්ගලයකු රක්වාන, මැදගංගොඩ ප්‍රදේශයේදී අත්අඩංගුවට ගෙන තිබේ.

උඩවලව පොලිස් විශේෂ කාර්ය බළකා කඳවුරට ලැබුණු තොරතුරකට අනුව සිදුකළ වැටලීමකදී සැකකරු අත්අඩංගුවට ගත් බව පොලිසිය සඳහන් කරයි.

සැකකරු සතුව තිබී කොඩයිට් කිලෝ 3ක්, ඇමෝනියෝ කිලෝ 9කට වැඩි ප්‍රමාණයක්, වෝටර් ජෙල් කුරු 15ක්, ඩෙටනේටර් 28ක් සහ සේවා නූල් අඩි 22ක් සොයාගෙන ඇත. අත්අඩංගුවට ගත් පුද්ගලයා රක්වාන ප්‍රදේශයේම පදිංචිකරුවෙකි. සිද්ධිය සම්බන්ධයෙන් වැඩිදුර විමර්ශන ක්‍රියාත්මක වේ.