මුදල්, ආර්ථික ස්ථායීකරණ හා ජාතික ප්‍රතිපත්ති අමාත්‍යාංශය යටතේ ඇති රාජ්‍ය ව්‍යවසාය දෙපාර්තමේන්තුව විසින්, ගල්-ඔය වැවිලි (පුද්) සමාගම වෙත නව මත්පැන් බෝතල් කිරීමේ (FL 1) බලපත්‍රයක් නිකුත් කිරීමට භාණ්ඩාගාර ලේකම්වරයාගේ අනුමැතිය ලැබී ඇති බව නිවේදනය කිරීමත් සමග, ආණ්ඩුවේ ගජමිතුරු ව්‍යාපාරික සබඳතා පිළිබඳ චෝදනා යළිත් කරලියට පැමිණ තිබේ.
රාජ්‍ය ව්‍යවසාය දෙපාර්තමේන්තුවේ අධ්‍යක්ෂ ජනරාල් පී.ඒ.එස්. අතුල කුමාර විසින් 2025 මැයි 16 දිනැතිව ශ්‍රී ලංකා සුරාබදු දෙපාර්තමේන්තුවේ කොමසාරිස් ජනරාල්වරයා වෙත යොමු කරන ලද ලිපිය මගින්, මෙම බලපත්‍රය නිකුත් කිරීම සඳහා පහත සඳහන් කරුණු දක්වා ඇත:
- ලිපිය, 2025 මාර්තු 03 දිනැති PED/A/GalOya/1/1(i) දරන අංකයෙන් යොමු කළ ලිපියට අදාළව ලියා ඇත.
- හිඟුරාන සීනි කර්මාන්තශාලාවේ බෝතල් කිරීමේ බලපත්‍රය දැනටමත් වෙනත් පාර්ශවයකට පවරා ඇති බව දැනුම් දී ඇත.
- එබැවින්, ගල්-ඔය වැවිලි (පුද්) සමාගමට නව බලපත්‍රයක් නිකුත් කිරීමට භාණ්ඩාගාර ලේකම්වරයා අනුමැතිය ලබා දී ඇත.
- ගල්-ඔය වැවිලි (පුද්) සමාගමට හැකි ඉක්මනින් නව බෝතල් කිරීමේ බලපත්‍රයක් නිකුත් කිරීමට අවශ්‍ය කටයුතු සලසන ලෙස ඉල්ලා ඇත.
මෙම ලිපියේ පිටපත් කර්මාන්ත හා ව්‍යවසාය සංවර්ධන අමාත්‍යාංශයේ ලේකම්, මූල්‍ය ප්‍රතිපත්ති දෙපාර්තමේන්තුවේ අධ්‍යක්ෂ ජනරාල් සහ ගල්-ඔය වැවිලි (පුද්) සමාගමේ ප්‍රධාන විධායක නිලධාරී වෙත ද යොමු කර ඇත.
මෙම තීරණය ගෙන ඇත්තේ, හිඟුරාන උක් කර්මාන්තශාලාව හරහා සීනි නිෂ්පාදනයට අමතරව ක්‍රියාත්මක වූ, අරක්කු බෝතල් කිරීමේ බලපත්‍රය වෙනත් පාර්ශවයකට පවරා ඇති බැවිනි.
මෙම FL 1 බලපත්‍රය සාමාන්‍ය මත්පැන් අලෙවි බලපත්‍රයක් (FL 3/FL 4) නොව, අරක්කු පෙරීම සඳහා ලබා දෙන බලපත්‍රයකි. මෙය සාමාන්‍යයෙන් නිකුත් කරන බලපත්‍රවලට වඩා බෙහෙවින් මිල අධික බලපත්‍රයක් බව සඳහන් වේ. මෙම බලපත්‍රය ලබා දී ඇත්තේ ශ්‍රී ලංකාවේ ප්‍රමුඛ පෙළේ ධනවත් ව්‍යාපාරිකයෙකු වන ඉෂාර නානායක්කාරටය. උඩ කී ගල්-ඔය වැවිලි (පුද්) සමාගම අයත් වන්නේ ඔහුට ය. (ගල්-ඔය ව්‍යාපාරය හරහා නිෂ්පාදනය වූ ‘ගල් අරක්කු’ කලක් ජනප්‍රියව පැවති අරක්කු වර්ගයකි.)
ජනතා විමුක්ති පෙරමුණ (ජවිපෙ) ප්‍රමුඛ මාලිමා ආණ්ඩුව යටතේ ගජමිතුරු ව්‍යාපාරිකයන්ට විශේෂ සැලකිලි සහ අතුරු සේවා සපයනු නොලැබෙන බවට වූ ජනතා විශ්වාසය මෙම සිදුවීමත් සමග පළුදු වී ඇති බව දේශපාලන විචාරකයෝ පෙන්වා දෙති. ජවිපෙ දිගින් දිගටම ධනපති පංතිය විවේචනය කරමින් සිටින පසුබිමක, මෙවැනි බලපත්‍රයක් ප්‍රධාන පෙළේ ධනවතෙකුට ලබා දීම දැඩි කතාබහට ලක්ව තිබේ.
සමහරු චෝදනා කරන්නේ, ජනාධිපති අනුර කුමාර දිසානායක ප්‍රමුඛ මාලිමා රජය සහ ඉෂාර නානායක්කාර අතර පවතින සමීප සබඳතාව හේතුවෙන් මෙම බලපත්‍රය නිකුත් වී ඇති බවයි. කොළඹ මහා නගර සභාවේ බලය පිහිටුවීමේදී විපක්ෂයේ මන්ත්‍රීවරුන් තම පාර්ශවයට ගැනීමට ඉෂාර නානායක්කාර මුදල් ආධාර සපයන බවට ද මීට පෙර චෝදනා එල්ල විය. ජවිපෙට බිලියන ගණන් ස්ථාවර තැන්පතු (FD) තිබුණ ද, ඔවුන් දෛනික දේශපාලන කටයුතු සහ විශේෂ අවස්ථා සඳහා මුදල් සොයා ගන්නේ මෙවැනි “ඩීල්” හෝ “කප්පම්” මගින් බවටද චෝදනා නැගේ. කොළඹ මහ නගර සභා බලය පිහිටුවීමට අරමුදල් සැපයීම වෙනුවෙන් ඉෂාර නානායක්කාරට මෙම FL 1 බලපත්‍රය “කප්පමක්” ලෙස ලබා දුන් බවටද මතයක් පවතී.
මෑතකදී අභාවප්‍රාප්ත වූ හැරී ජයවර්ධන, හිටපු ජනාධිපතිනී චන්ද්‍රිකා කුමාරතුංග සමග පැවති සමීප මිත්‍රත්වය හේතුවෙන් දිවයිනේ අරක්කු ව්‍යාපාරයේ ආධිපත්‍යය දැරූ අයෙකි. ඔහුගේ දූ දරුවන් විසින් ව්‍යාපාර පවත්වාගෙන ගියද, පෙර තරම් වේගවත්ව ඒවා ක්‍රියාත්මක නොවන බව සඳහන් වේ.
හිටපු ජනාධිපතිනී චන්ද්‍රිකා කුමාරතුංග හැරී ජයවර්ධන වැනි ව්‍යාපාරිකයන් වෙත ලබා දුන් ගජමිතුරු සහන, මේ වන විට ජවිපෙ ප්‍රමුඛ රජය හරහා ධම්මික පෙරේරා (ලංකාවේ සුළං බලශක්තිය පවරා දීම සම්බන්ධයෙන් චෝදනා එල්ල වී ඇත), සහ ඉෂාර නානායක්කාර වැනි ධනපති ව්‍යාපාරිකයින් කරා ද යොමුවෙන බව දේශපාලන විචාරකයෝ කණගාටුවෙන් වුවද පෙන්වා දෙති. ධම්මික පෙරේරා වෙත ලංකාවේ සුළං බලශක්තිය පාවා දී ඇති ආණ්ඩුව, මේ වන විට හැරී ජයවර්ධන සතුව පැවැති අරක්කු ව්‍යාපාරයේ ආධිපත්‍යය තම ගජමිතුරු ඉෂාර නානායක්කාර වෙත පවරා දීමට කටයුතු කරන බව පෙනේ.
මෙම සිදුවීම, ජනතා විමුක්ති පෙරමුණේ දේශපාලන ප්‍රතිපත්ති සහ ක්‍රියාකාරීත්වය පිළිබඳව මහජනතාව තුළ දැඩි කතාබහක් ඇති කර තිබේ.
