කොළඹ, කොටහේනේ සිසුවියකගේ සියදිවි හානිකරගැනීම සම්බන්ධයෙන් ශ්‍රී ලංකාවේ අධ්‍යාපන අමාත්‍යාංශය දැඩි කතාබහකට ලක්වෙමින් පවතී.
- බම්බලපිටියේ ඇය ඉගෙනුම ලැබූ පාසල ඉදිරිපිට ඊයේ දැවැන්ත විරෝධතාවයක්..!
- අධ්‍යාපන අමාත්‍යාංශය පැහැදිලි කිරීමක් ඉල්ලා සිටින අතර, අදාළ ගුරුවරයා මාරු කර යවා ඇත.
- අධිකරණ වෛද්‍ය නිලධාරීවරයා සිදුකළ සොයාගැනීම් මත පදනම්ව පොලිස් පැමිණිල්ලක් ගොනු කර ඇත.
- ගුරු සංගම් වහාම පරීක්ෂණයක් පවත්වා වැරදිකරුවන්ට නීතියෙන් දඬුවම් කරන ලෙස ඉල්ලා සිටී.
- විරෝධතාකරුවන් අගමැති/අධ්‍යාපන අමාත්‍යවරයාගෙන් අම්ෂිකාට යුක්තිය ඉටු කරන ලෙස ඉල්ලා සිටී.
බම්බලපිටිය, රාමනාදන් හින්දු කාන්තා විද්‍යාලයේ හිටපු සිසුවියක වූ ඩිල්ෂි අම්ෂිකා (15) පසුගිය අප්‍රේල් 29 වැනිදා සියදිවි හානිකරගත්තේ ඇය පාසලේ ගණිත ගුරුවරයෙකු විසින් සිදුකරන ලදැයි කියන ලිංගික හා මානසික අපයෝජනයන් හේතුවෙන් ඇයට විඳීමට සිදුවූ කම්පනය නිසාය. මේ සම්බන්ධයෙන් යුක්තිය ඉටුකරන ලෙස ඉල්ලමින් මැයි 8 වැනිදා (බ්‍රහස්පතින්දා) පාසල ඉදිරිපිට දැවැන්ත විරෝධතාවයක් පැවැත්විණි.
විරෝධතාකරුවන් පාසලෙන් සහ අදාළ බලධාරීන්ගෙන් ඉල්ලා සිටියේ සැකකරුවන් සහ ඔහුට නීතියෙන් මිදීමට ආධාර අනුබල දෙන අය අත්අඩංගුවට ගෙන මේ සම්බන්ධයෙන් පුළුල් විමර්ශනයක් ආරම්භ කරන ලෙසයි.
පැමිණෙන පීඩනය හමුවේ අධ්‍යාපන අමාත්‍යාංශය අම්ෂිකාගේ සියදිවි නසාගැනීම සම්බන්ධයෙන් පාසල් විදුහල්පතිවරයාගෙන් පැහැදිලි කිරීමක් ඉල්ලා ඇත. අමාත්‍යාංශ නිලධාරියෙකු පැවසුවේ අදාළ ගුරුවරයා මාරු කර යවා ඇති අතර, පොලිස් පරීක්ෂණයේ ප්‍රතිඵල මත පදනම්ව විනය ක්‍රියාමාර්ග ගන්නා බවයි.
කොළඹ විශ්වවිද්‍යාලයේ ළමා රෝග පිළිබඳ මහාචාර්ය හරේන්ද්‍ර ද සිල්වා ඩේලි මිරර් පුවත්පතට අදහස් දක්වමින් ප්‍රකාශ කොට ඇත්තේ අපරාධයක් සිදුකළ බවට චෝදනා එල්ල වී ඇති ගුරුවරයෙකු මාරු කිරීම විසඳුම නොවන බවයි.
“විනය ක්‍රියාමාර්ග ගැනීම විසඳුම නොවෙයි. අපරාධ පරීක්ෂණයක් සහ නඩු පැවරීමයි විසඳුම. අධ්‍යාපන අමාත්‍යාංශයට විනය පරීක්ෂණ පැවැත්වීමට කිසිදු බලයක් නැහැ. ළමා අපයෝජනය දණ්ඩ නීති සංග්‍රහය යටතට එන නිසා, පොලිසියට සහ ජාතික ළමා ආරක්ෂක අධිකාරියට අනිවාර්යයෙන්ම අදාළ සැකකරුව අත්අඩංගුවට ගෙන ඒ අනුව විමර්ශන සිදුකළ යුතුයි,”
මහාචාර්ය ද සිල්වා තවදුරටත් පවසන්නේ 1998 අංක 50 දරන ජාතික ළමා ආරක්ෂක අධිකාරී පනතට අනුව ළමා අපයෝජන සැකකරුවන් අත්අඩංගුවට ගැනීමට සහ ඔවුන් පැය 48ක් රඳවා තබා ගැනීමට ජාතික ළමා ආරක්ෂක අධිකාරියේ සභාපතිවරයාට බලය ඇති බවයි.
ලිංගික අපයෝජනය දණ්ඩ නීති සංග්‍රහය යටතට එන බවත්, දණ්ඩ නීති සංග්‍රහය යටතට ගැනෙන ඕනෑම දෙයක් සමාජයට එරෙහි ක්‍රියාවක් බවත් ඔහු පැවසීය.
“ක්‍රියාමාර්ග ගත යුතුයි. එය අධිකරණයෙන් පිටත විසඳිය නොහැකියි. ඇත්ත වශයෙන්ම ඔබට එය විසඳිය නොහැකියි. 1995 අංක 22 දරන දණ්ඩ නීති සංග්‍රහයේ සංශෝධනය යටතේ මේවා වරදකරුවන් කළ හැකි අපරාධ වන අතර වැරදිකරුවන්ට අනිවාර්ය සිර දඬුවම් හිමිවෙනවා. සාක්ෂි තිබියදීත් මේ පුද්ගලයාව අත්අඩංගුවට නොගන්නේ මන්දැයි මම දන්නේ නැහැ,” යනුවෙන් ඔහු වැඩිදුරටත් පැවසීය.
අදාළ ගුරුවරයා බම්බලපිටිය පොලිසිය විසින් අත්අඩංගුවට ගනු ලැබුව ද, පසුව ඔහු ඇප මත නිදහස් කර ඇත. මාධ්‍ය හමුවකදී අම්ෂිකාගේ මව ඇය පාසලේදී විඳි බව කියන අපයෝජනයන් පිළිබඳව කතා කළාය.
“ඇය මානසික ආබාධිත දරුවෙක් නොවෙයි. ඇය ඉතා දක්ෂයි. නමුත් පාසල ඇයව මානසික රෝගියෙක් බවට පත් කළා. පසුව මම ඇයව වෙනත් පාසලකට මාරු කිරීමට මැදිහත් වුණා. ඉන්පසුව ඇය රෝහල්ගත කරනු ලැබූ අතර ඇයට උපදේශනය ලබාදීමෙන් පසු ඇය යම් ප්‍රමාණයකට සුවය ලැබුවා. නමුත් පසුව ඇයට පෞද්ගලික පන්ති කාමරයක සිසුන් ඉදිරියේ ඇයට සිදුවූ නින්දාවන් පිළිබඳ මතකයන් නැවත නැවතත් එන්න පටන් ගත්තා. ඉන්පසුව ඇය නැවතත් මානසික අවපීඩනයට ලක් වුණා. එතෙක් ඇගේ නව පාසලේ සිසුන් මේ සිද්ධිය ගැන දැන සිටියේ නැහැ. නමුත් පෞද්ගලික පන්ති කාමරයේ සිදුවීමෙන් පසු ඇයට තවත් අප්‍රසන්න අත්දැකීම්වලට මුහුණ දීමට සිදු වුණා. මගේ දුවගේ මරණය මේ සමාජයට දැඩි පණිවිඩයක් විය යුතුයි. තවත් කිසිම දරුවෙකුට එවැනි කම්පනයකට මුහුණ දීමට සිදු නොවිය යුතුයි,” යනුවෙන් අම්ෂිකාගේ මව තම දියණිය වෙනුවෙන් යුක්තිය ඉල්ලා සිටියාය.
නමුත් ඇය අත්විඳි බව කියන ලිංගික අපයෝජනය සම්බන්ධයෙන් නැවත නැවතත් පැමිණිලි කළද, පාසල එම චෝදනා ප්‍රතික්ෂේප කළ බව වාර්තා වේ. අම්ෂිකාට ප්‍රතිකාර කළ වෛද්‍ය වෘත්තිකයා විසින් සකස් කරන ලද වාර්තාවේ සොයාගැනීම් මත පදනම්ව බාලවයස්කාර දැරියකට ලිංගික හා මානසික අපයෝජනයක් සිදුකිරීම සම්බන්ධයෙන් අධිකරණ වෛද්‍ය නිලධාරීවරයා විසින්ම පොලිස් පැමිණිල්ලක් ගොනු කර ඇති බව ද වාර්තා වේ.
ලංකා ගුරු සංගමයේ මහලේකම් ජෝසප් ස්ටාලින් බලධාරීන්ගෙන් ඉල්ලා සිටියේ මේ සම්බන්ධයෙන් පුළුල් විමර්ශනයක් සිදුකර වහාම වැරදිකරුවන්ට නීතිය ක්‍රියාත්මක කරන ලෙසයි.
විරෝධතාවයට රැස්ව සිටි පිරිස අග්‍රාමාත්‍ය සහ අධ්‍යාපන අමාත්‍ය ආචාර්ය හරිනි අමරසූරියගෙන් සහ අදාළ බලධාරීන්ගෙන් ඉල්ලා සිටින්නේ විමර්ශන කඩිනම් කර අම්ෂිකාට යුක්තිය ඉටු කරන ලෙසයි.
මෙම සිද්ධිය සම්බන්ධයෙන් රජයේ ස්ථාවරය සහ සැකකාර ගුරුවරයා සම්බන්ධයෙන් ඉදිරියේදී ගන්නා ක්‍රියාමාර්ග පිළිබඳව විමසීමට අධ්‍යාපන අමාත්‍ය ආචාර්ය අමරසූරිය, නියෝජ්‍ය අධ්‍යාපන අමාත්‍ය ආචාර්ය මධුර සෙනෙවිරත්න සහ ආණ්ඩු පක්ෂයේ ප්‍රධාන සංවිධායක ආචාර්ය නලින්ද ජයතිස්ස මහතා සම්බන්ධ කර ගැනීමට ඩේලි මිරර් ගත් උත්සාහයන් අසාර්ථක වී තිබේ.
ඩේලි මිරර් ඇසුරිනි.
