සංචාරක කර්මාන්තය ප්‍රවර්ධනය කිරීම සහ රටේ ආර්ථිකයට සෘජු ආදායමක් ලබා ගැනීමේ අරමුණින් නව කාර්ය සාධක බලකායක් පිහිටුවීමට රජය තීරණය කර ඇති බව විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා පැවසීය.

මෙම කාර්ය සාධක බලකායේ පළමු සැසිය ඊයේ (සැප්තැම්බර් 02) ජනාධිපති කාර්යාලයේදී ආරම්භ වූ අවස්ථාවේදී අමාත්‍යවරයා මේ බව සඳහන් කළේය.

මෙම බලකාය මඟින් සංචාරක ක්ෂේත්‍රය නඟා සිටුවීමට අවශ්‍ය සැලසුම් සකස් කිරීමට, සංචාරකයන් සහ ව්‍යවසායකයින් මුහුණ දෙන ගැටලු සාකච්ඡා කිරීමට සහ රාජ්‍ය ආයතන ඒකාබද්ධ රාමුවක් යටතේ ක්‍රියාත්මක කිරීමට හැකි වනු ඇතැයි අපේක්ෂා කෙරේ.

ඉදිරියේදී පැමිණෙන සංචාරක සමය සාර්ථක කර ගැනීම සඳහා සියලු රාජ්‍ය ආයතන සහ පෞද්ගලික අංශය සමඟ සාකච්ඡා කර ඉදිරි සැලසුම් සකස් කිරීමේ අවශ්‍යතාව ද මෙහිදී අවධාරණය කෙරිණි.

ශ්‍රී ලංකා රේගුවට අයත් කටුනායක ගුවන්තොටුපළ පර්යන්තයට රුපියල් කෝටි පහක පමණ වටිනාකමකින් යුත් අති නවීන පරිලෝකන යන්ත්‍ර දෙකක් එක්කර ඇතැයි වාර්තා වෙයි.

මෙම යන්ත්‍රවල විශේෂත්වය වන්නේ 2D තාක්ෂණය මත පදනම්ව පරිලෝකන ක්‍රියාවලිය සිදු කිරීමය. එමඟින් නීතිවිරෝධී ද්‍රව්‍ය හඳුනාගැනීමේ හැකියාව ඉහළ නංවී ඇති බව ගුවන්තොටුපොළ රේගු අධ්‍යක්ෂ තිළිණි පීරිස් පැවසීය.

ඇතැම් විට රට තුළට රහසින් ගෙන ආ නීතිවිරෝධී මත්ද්‍රව්‍ය, සිගරට් ඇතුළු භාණ්ඩ පරිලෝකනයට මෙම නව යන්ත්‍ර ප්‍රධාන අවධානය යොමු කරන බවද සදහන් කරයි.

දැනටමත් රේගු නිලධාරීන්ට මෙය භාවිතා කිරීමේ පුහුණු වැඩමුළු ලබාදී ඇති අතර, අනාගතයේ තවදුරටත් පුහුණු සැසි පවත්වා නව තාක්ෂණය සම්පූර්ණයෙන් යොදාගැනීමට සැලසුම් කර ඇති බවද රේගු බලධාරීන් තහවුරු කර තිබේ.

ලෝක වෙළෙඳපොළේ රන් මිල ඉහළ යෑමත් සමඟ මෙරට රන් මිල ද වාර්තාගත ලෙස ඉහළ ගොස් ඇති බව සමස්ත ලංකා ස්වර්ණාභරණ සංගමය පවසයි.

සංගමයේ ලේකම් රාමන් බාලසුබ්‍රමනියම් මහතා සඳහන් කළේ, ඊයේ (සැප්තැම්බර් 02) දිනයේදී කැරට් 24 රන් පවුමක් රුපියල් 285,000ක් ලෙසත්, කැරට් 22 රන් පවුමක් රුපියල් 263,000ක් ලෙසත් අලෙවි වූ බවයි.

ලෝක වෙළෙඳපොළේ රන් අවුන්සයක මිල මේ වන විට ඇමරිකානු ඩොලර් 3,531 දක්වා ඉහළ ගොස් ඇති අතර, මෙරට රන් මිල තවදුරටත් ඉහළ යෑමට ඉඩ ඇති බවටද ඔහු අනතුරු අඟවයි.

පොලිස් මූලස්ථානයේ විදුලි සෝපාන ක්‍රියාකරුවෙකුට සාපරාධී බලහත්කාරය හා බිය ගැන්වීම් කළ බවට එල්ල වූ චෝදනාවලින් හිටපු පොලිස්පති පූජිත් ජයසුන්දර මහතා නිදහස් කිරීමට කොටුව මහේස්ත්‍රාත් අධිකරණය නියෝග කර තිබේ.

අදාළ නඩුව අද (සැප්තැම්බර් 03) අධිකරණයේදී කැඳවූ අවස්ථාවේදී මෙම නියෝගය ලබා දී ඇත.

විපක්ෂයේ දේශපාලනඥයින් ඉදිරි මැතිවරණයක් සඳහා සන්ධානගතව තරග වදින්නේ නම් ඔවුන්ට හොඳම ඡන්ද ලකුණ බන්ධනාගාර ලකුණ බව වෘත්තීය අධ්‍යාපන නියෝජ්‍ය අමාත්‍ය නලින් හේවගේ මහතා පවසයි.

“නීතිය අවභාවිතාවේ යොදවපු ගොඩක් දෙනා හිරගෙදර කූරු ගණිනවා. ඒකට අපට කරන්න දෙයක් නෑ. ඒක වත්මන් පාලනය වන අපිටත් විශේෂයෙන්ම වැදගත්. මොකද අපිත් දැන් එක පාරක් දෙකක් තුනක් නෙවෙයි දහපාරක් හිතලා තමයි දේශපාලන තීන්දු තීරණ ගන්නේ”

“ඔය එකතුවීම මතුපිටින් පෙනෙන්නේ අද වුණාට මේ තොරණේ පිටිපස්සේ ඔක්කොම එකතැනක ඉන්නෙ කියලා අපි ගොඩක් කල් ඉඳලා කියනවා. වෙන්වෙලා හොරකම් කරලා එක්වෙලා බේරාගන්න උත්සාහ කරනවා නම් ඒක හරියන්නෙ නෑ. ඉතිහාසයේ ඔයාලා එහෙම කළාට අනාගතයේ එහෙම කරන්න බෑ. ඔයාලාට ගොඩාක් හිමිතැන තමයි බන්ධනාගාරය. මං හිතන්නේ ඉස්සරහට එකතුවෙලා ඡන්දයකට එනවා නම් බන්ධනාගාර ලකුණ තමයි හොඳම ලකුණ”

නියෝජ්‍ය අමාත්‍යවරයා මේ බව පැවසුවේ ගාල්ල ප්‍රදේශයේ පැවති උත්සවයකින් අනතුරුව මාධ්‍ය වෙත අදහස් දක්වමිනි.

රත්නපුර ශික්ෂණ රෝහලේ සේවය කළ තිස් දෙහැවිරිදි වෛද්‍යවරියක, පෞද්ගලික මගී බස් රථ අනතුරකින් දිවි අහිමි වී තිබේ.

මොරගහයට පදිංචිව සිටි එක්දරු මවක වූ මදාරා මධුභාෂිනි නම් වෛද්‍යවරිය, සේවය නිම කර නිවෙසට යාමේ දී බස් රථයෙන් ඇද වැටී බරපතල තුවාල ලබා දින 14ක් දැඩි සත්කාර ඒකකයේ සටන් කළ ද, පසුගිය 1 වැනිදා මියගිය බව පැල්මඩුල්ල පොලිසිය සදහන් කරයි.

අනතුර සිදු වී ඇත්තේ ඉකුත් 19 වැනිදා මඩකලපුව–කොළඹ ප්‍රධාන මාර්ගයේ පැල්මඩුල්ල පොලිස් ස්ථානය අසලය. ත්‍රීරෝද රථයක් මාර්ගය හදිසියේ හරහා ගමන් කිරීම නිසා බස් රියදුරා තිරිංග තද කළ විට, වෛද්‍යවරිය දොරටුවෙන් විසිවී මාර්ගයේ ඇද වැටී ඇති බව මරණ පරීක්ෂණය හෙළි කරයි.

මෙම වෛද්‍යවරියගේ අවසන් කටයුතු අද පස්වරුවේ රත්නපුරේදී සිදුකිරීමට නියමිතය.

ඊයේ (සැප්තැම්බර් 02) දිනය තුළ දිවයිනේ විවිධ ප්‍රදේශවලින් වාර්තා වූ රිය අනතුරු හේතුවෙන් පුද්ගලයින් පස් දෙනෙකු ජීවිතක්ෂයට පත්ව ඇතැයි පොලීසිය පවසයි.

පොල්ගහවෙල-කෑගල්ල මාර්ගයේදී පෞද්ගලික බස් රථයක යතුරුපැදියක ගැටීමෙන් 8 හැවිරිදි දැරියක් මියගොස් තිබේ. අනතුර සිදුවන අවස්ථාවේදී ඇය යතුරුපැදියේ පිටුපස ගමන් කරමින් සිට ඇති අතර, තුවාල ලබා රෝහල් ගත කිරීමෙන් පසු ජීවිතක්ෂයට පත් වී ඇත. බස් රථයේ රියදුරු අත්අඩංගුවට ගෙන ඇත.

රත්නපුර-පානදුර මාර්ගයේදී සිදුවූ අනතුරකින් 82 හැවිරිදි කාන්තාවක් මියගොස් ඇත. රියදුරුට පාලනය කරගත නොහැකි වූ මෝටර් රථයක් මාර්ගයෙන් ඉවතට පැන බෝක්කුවක ගැටීමෙන් මෙම අනතුර සිදුව තිබේ.

කටුනායක-කිඹුලාපිටිය මාර්ගයේදී යතුරුපැදියක් මාර්ගය හරහා ගමන් කරමින් සිටි 50 හැවිරිදි පදිකයෙකුගේ ගැටීමෙන් අනතුරක් සිදුව ඇත. අනතුරින් තුවාල ලැබූ පදිකයා සහ යතුරුපැදිකරු රෝහල් ගත කිරීමෙන් පසු පදිකයා මියගොස් තිබේ.

කළුවන්කේණි දුම්රිය හරස් මාර්ගයේදී සීඝ්‍රගාමී දුම්රියක යතුරුපැදියක් ගැටීමෙන් 26 හැවිරිදි යතුරුපැදිකරුවා එම ස්ථානයේම ජීවිතක්ෂයට පත්ව ඇත.

හලාවත-පුත්තලම මාර්ගයේදී යතුරුපැදියක් මාර්ගය හරහා ගමන් කළ පදිකයෙකුගේ ගැටීමෙන් සිදුවූ අනතුරකින් එම පදිකයා මියගොස් තිබේ. තුවාල ලැබූ යතුරුපැදිකරු සහ පදිකයා රෝහල් ගත කිරීමෙන් පසු පදිකයා ජීවිතක්ෂයට පත් වී ඇත. මියගිය පුද්ගලයාගේ අනන්‍යතාව මෙතෙක් තහවුරු වී නොමැත.

මෙම අනතුරු සම්බන්ධයෙන් අදාළ පොලිස් ස්ථාන මඟින් වැඩිදුර විමර්ශන සිදු කරයි.

ජාතික ඩෙංගු මර්දන ඒකකය පවසන පරිදි, මේ වසරේ ගතවූ මාස අටක් තුළ ඩෙංගු රෝගින් 36,708ක් මෙරටින් වාර්තා වී ඇත.

අගෝස්තු මාසය තුළ පමණක් 2,749 නව රෝගීන් හඳුනාගෙන ඇති අතර, පෙර කාලයට සාපේක්ෂව එය අඩු සංඛ්‍යාවක් ලෙස සෞඛ්‍ය අංශ පෙන්වයි.

මේ අතර, ජීවිත 19ක් දැනටමත් අහිමිවී තිබේ.

වෛද්‍යවරුන් අවධාරණය කරන්නේ, ඩෙංගු සහ චිකුන්ගුන්යා රෝග දෙකම මේ දිනවල ව්‍යාප්ත වන බැවින්, උණ ඇති පුද්ගලයෙකු පැරසිටමෝල් පමණක් භාවිත කළ යුතු බවයි. වෙනත් වේදනා නාශක භාවිත කළහොත් අභ්‍යන්තර රුධිර වහනයට ලක් වීමේ අවදානම තිබේ.

එමෙන්ම, උණ දින තුනකට වඩා පවතින අවස්ථාවල වහාම වෛද්‍ය ප්‍රතිකාර සඳහා යොමු වන ලෙසත් ජනතාවට උපදෙස් දී ඇත.