ආචාර්යවරුන්ගේ හිඟය සහ ප්‍රමාණවත් යටිතල පහසුකම් නොමැතිකම හේතුවෙන් ඇතැම් විශ්වවිද්‍යාල පීඨ වසා දැමීමට වත්මන් රජය සාකච්ඡා පවත්වන බවට තොරතුරු අනාවරණය වී ඇතැයි විශ්වවිද්‍යාල ආචාර්යවරුන්ගේ සමිති සම්මේලනය (FUTA) පවසයි.

මෙවැනි තීරණයක් මීට පෙර කිසිදු රජයක් විසින් ගෙන නොමැති බවත්, මෙය බරපතළ තත්ත්වයක් බවත් සමිති සම්මේලනයේ මාධ්‍ය ප්‍රකාශක, ජ්‍යෙෂ්ඨ කථිකාචාර්ය චාරුදත්ත ඉලංගසිංහ මහතා පෙන්වා දෙයි.

“අවශ්‍ය මානව සම්පත් බඳවාගෙන, යටිතල පහසුකම් වැඩිදියුණු කරනවා වෙනුවට විශ්වවිද්‍යාල වසා දැමීමට සාකච්ඡා කිරීම කිසිසේත්ම නොවිය යුත්තක්” යැයි ඔහු අවධාරණය කළේය.

යම් හෙයකින් රජය විශ්වවිද්‍යාල හෝ පීඨ වසා දැමීමට කටයුතු කළහොත් ඊට එරෙහිව කොන්දේසි විරහිතව විරෝධය පළ කරන බව ආචාර්යවරුන්ගේ සමිති සම්මේලනය වැඩිදුරටත් සඳහන් කළේය.

මෙම චෝදනා සම්බන්ධයෙන් රජයේ නිල ප්‍රකාශයක් මෙතෙක් නිකුත් වී නොමැත.

ශ්‍රී ලංකාවේ ඩිජිටල් සේවා සඳහා පැනවීමට නියමිතව තිබූ වැට් බද්ද ලබන වසරේ අප්‍රේල් 01 වැනිදා දක්වා කල් දැමීමට අමාත්‍ය මණ්ඩලය තීරණය කර ඇත. මුදල්, ක්‍රම සම්පාදන සහ ආර්ථික සංවර්ධන අමාත්‍ය වශයෙන් ජනාධිපති අනුර කුමාර දිසානායක මහතා ඉදිරිපත් කළ යෝජනාවට කැබිනට් අනුමැතිය ලැබී තිබේ.

අගය මත බදු (සංශෝධන) පනත මඟින්, 2025 ඔක්තෝබර් 01 වැනිදා සිට නිර්වාසික (non-resident) පුද්ගලයන් විසින් සපයනු ලබන ඩිජිටල් සේවා සඳහා වැට් බද්ද අය කිරීමට නියමිතව තිබුණි. කෙසේ වෙතත්, මෙම නීතියට අනුකූල වීමට සූදානම් වීම සඳහා අමතර කාලයක් ලබා දෙන ලෙස නිර්වාසික ඩිජිටල් සේවා සපයන්නන් කළ ඉල්ලීමක් සැලකිල්ලට ගනිමින් මෙම තීරණය ගෙන ඇත.

මෙම වැට් බද්ද සයිබර් ආරක්ෂණ, මෘදුකාංග, ඩිජිටල් ප්‍රචාරණ, ඊ-වාණිජ්‍යය, සමාජ මාධ්‍ය වේදිකා සහ ඔන්ලයින් වෙළෙඳපොළ ඇතුළු බොහෝ ඩිජිටල් සේවාවන් සඳහා බලපැවැත්වෙනු ඇත. බදු අය කිරීමේ දිනය කල් දැමීම සඳහා අවශ්‍ය සංශෝධන දැනටමත් කෙටුම්පත් කරමින් පවතින බව රජය පවසයි.

මේ අතර, ඩිජිටල් සේවා සඳහා බදු පනවන රටවලට ‘අමතර තීරු බදු’ පනවන බවට ඇමරිකානු ජනාධිපති ඩොනල්ඩ් ට්‍රම්ප් මහතා පසුගිය සතියේදී ප්‍රකාශ කර තිබීම මෙම කල් දැමීමට බලපාන්නට ඇතැයි මත පළ වේ.

ශ්‍රී ලංකාවේ නිල විදේශ සංචිත 2025 අගෝස්තු මාසයේදී සුළු වර්ධනයක් පෙන්නුම් කර ඇති බව ශ්‍රී ලංකා මහ බැංකුව පවසයි.

ඒ අනුව, අගෝස්තු මාසය අවසානයේදී රට සතු නිල සංචිත වත්කම් ප්‍රමාණය ඇමරිකානු ඩොලර් බිලියන 6.166ක් දක්වා ඉහළ ගොස් තිබේ. මෙය, ජූලි මාසය අවසානයේ වාර්තා වූ ඇමරිකානු ඩොලර් බිලියන 6.147ක සංචිත වත්කම් ප්‍රමාණයට සාපේක්ෂව 0.3%ක වර්ධනයකි.

මෙම සුළු වර්ධනය, රටේ විදේශ විනිමය ස්ථාවරත්වය පවත්වාගෙන යාමට සහ ආර්ථිකයට ධනාත්මක බලපෑමක් ඇති කිරීමට උපකාරී වනු ඇතැයි ආර්ථික විශේෂඥයෝ පෙන්වා දෙති.

වසර 102ක් පැරණි කුරුඳුවත්ත පොලිස් ස්ථානයේ ප්‍රතිසංස්කරණය කරන ලද පරිපාලන ගොඩනැගිල්ල අද උදෑසන විවෘත කෙරිණි. රුපියල් මිලියන 70ක් වැය කරමින් අංගසම්පූර්ණව නවීකරණය කරන ලද මෙම ගොඩනැගිල්ල, මහජන ආරක්ෂක අමාත්‍ය ආනන්ද විජේපාල මහතාගේ ප්‍රධානත්වයෙන් සහ පොලිස්පති නීතිඥ ප්‍රියන්ත වීරසූරිය මහතාගේ සහභාගීත්වයෙන් ජනතා අයිතියට පත් කරන ලදී.

මෙම ගොඩනැගිල්ල 1923 වසරේදී ඔබේසේකර පවුල විසින් ශ්‍රී ලංකා පොලීසියට පරිත්‍යාග කර ඇති අතර, එම පවුලේ සාමාජිකාවක් වන සොන්ඩ්‍රාල් හිරන්ති ඔබේසේකර මහත්මියද මෙම අවස්ථාවට සහභාගි වීම විශේෂත්වයකි.

නවීකරණය කරන ලද ගොඩනැගිල්ල තුළ නවීන අවි ගබඩාවක්ද ස්ථාපිත කර තිබේ.

මෙම අවස්ථාවට විශ්වවිද්‍යාල ප්‍රතිපාදන කොමිෂන් සභාවේ සභාපති ජ්‍යෙෂ්ඨ මහාචාර්ය කපිල සෙනෙවිරත්න, බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න, කොළඹ දිසාව භාර නියෝජ්‍ය පොලිස්පති නිශාන්ත ද සොයිසා, කොළඹ දකුණ කොට්ඨාස භාර ජ්‍යෙෂ්ඨ පොලිස් අධිකාරි ඩී.එල්.ඒ. සූරියබණ්ඩාර යන මහත්වරුන් ඇතුළු පොලිස් නිලධාරීහු රැසක් සහභාගී වූහ.

ඇල්ල-වැල්ලවාය මාර්ගයේ සිදුවූ දරුණු බස් අනතුරට අදාළ ජීප් රථයේ රියදුරු පොලිසිය විසින් අත්අඩංගුවට ගෙන ඇත. මෙම අනතුරෙන් පුද්ගලයන් 15 දෙනෙකු ජීවිතක්ෂයට පත් වූ අතර 18 දෙනෙකු තුවාල ලැබූහ.

පොලිසිය පැවසුවේ බස් රථය ඇල්ල දෙස සිට වැල්ලවාය දෙසට ගමන් කරමින් සිටියදී, ඉදිරියෙන් පැමිණි ජීප් රථයක ගැටී ප්‍රපාතයකට පෙරළී ඇති බවයි. ඊයේ (සැප්තැම්බර් 04) රාත්‍රී 9:00ට පමණ මෙම ඛේදවාචකය සිදුවිය.

අත්අඩංගුවට ගත් ජීප් රියදුරාගෙන් මේ වන විට ප්‍රශ්න කරමින් සිටින අතර, අනතුරට හේතුව පිළිබඳව වැඩිදුර විමර්ශන ක්‍රියාත්මකයි. මෙම මාරක අනතුරින් මියගිය සහ තුවාල ලැබූවන් අතර තංගල්ල නගර සභාවේ සේවකයන් සහ ඔවුන්ගේ පවුලේ සාමාජිකයන් සිටින බව මීට පෙර වාර්තා විය.

ඇල්ල-වැල්ලවාය මාර්ගයේ ඊයේ (සැප්තැම්බර් 04) රාත්‍රියේදී ප්‍රපාතයකට පෙරළී අනතුරට පත් වූ බස් රථය ගොඩ ගැනීමේ මෙහෙයුම් අද උදෑසන ආරම්භ විය.

යුද හමුදා කණ්ඩායම්වල සහාය ඇතිව මෙම මෙහෙයුම ක්‍රියාත්මක වන බව වාර්තා වේ. බස් රථය සහ එහි ගමන් ගත් මගීන්ගේ බඩු මුට්ටුද ගොඩ ගැනීමට කටයුතු කරන බව බලධාරීහු පවසති.

අනතුර සම්බන්ධයෙන් වැඩිදුර විමර්ශන සිදුවෙමින් පවතින අතර, අනතුරට හේතුව මෙතෙක් නිශ්චිතවම අනාවරණය වී නොමැත. මෙම අනතුරෙන් ජීවිතක්ෂයට පත් වූ සංඛ්‍යාව සහ තුවාල ලැබූ සංඛ්‍යාව පිළිබඳව නිල වශයෙන් තවමත් තොරතුරු නිකුත් කර නොමැත.

සිද්ධිය වූ ස්ථානයේ තත්ත්වය මේ වන විට සාමාන්‍ය තත්ත්වයට පත්වෙමින් පවතින අතර, මාර්ගය විවෘත කිරීමට කටයුතු කරමින් සිටින බව පොලිසිය පවසයි.

මෙවැනි අනතුරු අවම කර ගැනීම සඳහා මාර්ග ආරක්ෂාව සම්බන්ධයෙන් ජනතාව වඩාත් සැලකිලිමත් විය යුතු බවට ප්‍රවාහන බලධාරීන් අවධාරණය කරයි.

ශ්‍රී ලංකාවේ ද්විතීයික සෞඛ්‍යය සේවා ශක්තිමත් කිරීම සඳහා ආසියානු සංවර්ධන බැංකුව ඩොලර් මිලියන 106.9ක මූල්‍ය පහසුකමක් ලබාදීමට තීරණය කර තිබේ. මෙම ණය පහසුකමින් ඩොලර් මිලියන 100ක් ඒකාබද්ධ සෞඛ්‍යය සේවා සහ විශ්ව සෞඛ්‍ය ආවරණ සඳහා පාලනය ශක්තිමත් කිරීමේ වැඩසටහන යටතේ ණය මුදලක් ලෙස ලබාදෙයි. වසංගත වැළැක්වීම, සූදානම සහ ප්‍රතිචාර භාර අරමුදලෙන් ඩොලර් මිලියන 6.9ක මුදලක් ලබාදෙන්නේ ආපසු නොගෙවන ප්‍රදානයක් ලෙසිනි.

ශ්‍රී ලංකාවේ ද්විතීයික සුව කිරීමේ සත්කාර සේවා ශක්තිමත් කිරීම, බෝවන රෝග වැළැක්වීම සහ පාලනය වැඩිදියුණු කිරීම සහ සෞඛ්‍ය සේවා අංශයේ පාලනය සහ කළමනාකරණ ධාරිතාව වැඩිදියුණු කිරීම සඳහා ආසියානු සංවර්ධන බැංකුව (ADB) මෙම මුදල ලබා දෙයි. “සියලු දෙනාටම සෞඛ්‍යය සේවා සඳහා ප්‍රවේශය සහ ගුණාත්මකභාවය සහතික කිරීමේදී ශ්‍රී ලංකාව ආකර්ෂණීය ජයග්‍රහණ ලබා ඇත.” ADBහි ශ්‍රී ලංකා අධ්‍යක්ෂ ටකෆුමි කඩෝනෝ පැවසීය. “නමුත් ආයු කාලය ඉහළ යෑම සහ ජීවන රටා වෙනස් වීමත් සමඟ, වැඩිහිටි සෞඛ්‍යය සේවා අවශ්‍යතා සහ බෝ නොවන රෝග වැඩි වෙමින් පවතී. එවැනි ජනවිකාස සහ රෝග රටා වෙනස්කම් සඳහා වැඩිදියුණු කළ නඩු කළමනාකරණ ධාරිතාවක් සහිත රෝගී කේන්ද්‍රීය ප්‍රතිකාර සහ සත්කාර සේවා ඵලදායී ලෙස සැපයීම සඳහා වඩාත් ශක්තිමත් ද්විතීයික සත්කාරයක් අවශ්‍ය වේ යැයි ද ඔහු පැවසීය.

මෙම ප්‍රතිඵල පාදක ණය දීමේ වැඩසටහන, රෝහල් සංවර්ධනයට සහාය වීමෙන් රට පුරා ද්විතීයික සත්කාර සේවාවන්හි ගුණාත්මකභාවය, ධාරිතාව සහ කාර්යක්ෂමතාව වැඩිදියුණු කරනු ඇතැයි අපේක්ෂා කෙරේ.

ශුද්ධ වූ මුහම්මද් නබිතුමන්ගේ උපන්දිනය සමරමින් ලොව පුරා ඉස්ලාම් බැතිමතුන් විවිධ ආගමික වැඩසටහන්වලට එක්ව සිටියි.

ස්වකීය ජීවිතය පුරා මිනිසත් බව වෙනුවෙන් නබි තුමන් කළ කැපිකිරීම් අපිරිමිතය.

අනෝන්‍ය අවබෝධය සහෝදරත්වය එකිනෙකාට උපකාර කිරීම හා සාධාරණත්වය නබිතුමන්ගේ මූලික ඉගැන්වීම්වල හරය වේ.

මානව සමාජය ගුණ නැන බෙලෙන් හා අවිහිංසාවාදයෙන් පුරවාලිය යුතු බවයි එතුමන්ගේ දර්ශනය විය.

සමාජයේ ඇති නැති පරතරය සහ දුරස්බව මුලිනුපුටා දමා සමානාත්මතාව මිනිස් හදවත්හි රෝපණය කිරීමට අරගලයක් දියත් කළ නබිනායකතුමන්ගේ ආදර්ශය, සමාජමය අභියෝග ජය ගනිමින් සමනාත්මතාවෙන් සපිරි, නීතිගරුක සහ සාරධාර්මික රටක් ගොඩනැඟීමට දරන ප්‍රයත්නයේදී නොනිමෙන ආලෝකයක් සපයන බව ජනාධිපති අනුර කුමාර දිසානායක මහතා පවසයි.

ශුද්ධ වූ මුහම්මද් නබිතුමන්ගේ ජන්ම දිනය වෙනුවෙන් පණිවුඩයක් නිකුත් කරමින් ජනාධිපතිවරයා මේ බව සඳහන් කරයි.

මහජන ආරක්ෂක අමාත්‍යාංශයේ ලේකම්, විශ්‍රාමික ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්න මහතාට එරෙහිව ගල්කිස්ස මහේස්ත්‍රාත් අධිකරණයේ පැවති නඩු විභාගයක් තාවකාලිකව අත්හිටුවමින් අභියාචනාධිකරණය අද (4) අතුරු තහනම් නියෝගයක් නිකුත් කළේය.

2023 වසරේදී බීමත්ව රිය පදවා අනතුරක් වළක්වා ගැනීමට කටයුතු නොකිරීම ඇතුළු චෝදනා යටතේ සෙනෙවිරත්න මහතාට එරෙහිව මෙම නඩුව පවරා තිබුණි.

තමාට එරෙහි නඩුව වෙනත් අධිකරණයකට මාරු කරන ලෙස ඉල්ලා සෙනෙවිරත්න මහතා ඉදිරිපත් කළ පෙත්සමක් සලකා බැලීමෙන් අනතුරුව මෙම නියෝගය ලබා දී ඇත. මායාදුන්නේ කොරයා සහ මහේන් ගොපල්ලව යන විනිසුරු මඩුල්ල විසින් අභියාචනාධිකරණයේදී මෙම නියෝගය නිකුත් කරන ලදී.

ශ්‍රී ලංකාව සහ ඉතාලිය අතර දේශපාලන උපදේශන සමාරම්භක සැසිය සාර්ථකව අවසන් වූ බව විදේශ කටයුතු හා විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා අද (සැප්තැම්බර් 04) ප්‍රකාශ කළේය. ඉතාලියේ විදේශ කටයුතු සහ ජාත්‍යන්තර සහයෝගීතාව පිළිබඳ නියෝජ්‍ය අමාත්‍ය මරියා ට්‍රිපොඩි මහත්මියගේ සහභාගීත්වයෙන් මෙම සාකච්ඡා පැවැත්විණි.

නව ගිවිසුමකින් ද්විපාර්ශවික සබඳතා ශක්තිමත් කෙරේ
වසර හතළිහකට වඩා පැරණි මිත්‍රත්වය තවදුරටත් ශක්තිමත් කිරීමේ වැදගත් පියවරක් ලෙස, දෙරට අතර දේශපාලන උපදේශන යාන්ත්‍රණයක් පිහිටුවීම සඳහා අවබෝධතා ගිවිසුමකට (MoU) අත්සන් තැබූ බව නියෝජ්‍ය අමාත්‍යවරයා සඳහන් කළේය.

මෙම සාකච්ඡාවේදී දෙරට අතර වාණිජ හා ආයෝජන, සංචාරක කටයුතු, අධ්‍යාපන සහ සංස්කෘතික හුවමාරු, බලශක්ති, කෘෂිකාර්මික ක්ෂේත්‍ර, ඉතාලි රියදුරු බලපත්‍ර සම්බන්ධ එකඟතාව, ගුවන් ගමන් සේවා, නාවික කටයුතු සහ පාරම්පරික උරුම සංරක්ෂණය වැනි විවිධ ක්ෂේත්‍ර පිළිබඳව අවධානය යොමු වී ඇත.

මෙම සාකච්ඡා වටය ශ්‍රී ලංකාව සහ ඉතාලිය අතර හවුල්කාරිත්වය සඳහා නව පරිච්ඡේදයක් ආරම්භ කරන සාර්ථක පියවරක් වූ බව ද නියෝජ්‍ය අමාත්‍යවරයා වැඩිදුරටත් ප්‍රකාශ කළේය.