කෘෂිකර්ම අමාත්‍ය කේ.ඩී. ලාල්කාන්ත පෙරේදා (ජූලි 18) ප්‍රකාශ කළ වැව් රක්ෂිත ඉඩම් ආක්‍රමණය කර ඇති සියලුම අනවසර ඉදිකිරීම් ඉවත් කරන බවට වූ ප්‍රකාශයට මේ වන විට දැඩි අභියෝගයක් එල්ල වී තිබේ.

ජනතා විමුක්ති පෙරමුණේ (ජ.වි.පෙ.) හිටපු මධ්‍යම කාරක සභිකයෙකු ද, වන පෙරටුගාමී සමාජවාදී පක්ෂයේ ඉන්ද්‍රානන්ද සිල්වා අමාත්‍යවරයාගේ ප්‍රකාශය “කයිවාරුවක්” ලෙස හඳුන්වමින්, පොලොන්නරුවේ පරාක්‍රම සමුද්‍රය ආසන්නයේ ඉදිකර ඇති ප්‍රකට “සුදු අරලිය” හෝටලය ඉවත් කරන ලෙසට සෘජුවම අභියෝග කර ඇත.

ඉන්ද්‍රානන්ද සිල්වා වැඩිදුරටත් අවධාරණය කළේ, ව්‍යාපාරික ඩඩ්ලි සිරිසේනට අයත් “සුදු අරලිය” හෝටලයේ එළිමහන් පිරිස් රැස් වන ස්ථානයට ජලය පිරුණු වහාම පරාක්‍රම සමුද්‍රයේ වාන් දොරටු දහයක් විවෘත වන බවට පැතිර යන කතාව, නිසි වැසි නොමැති වුවද සිදුවන බවයි. මෙම තත්ත්වය සම්බන්ධයෙන් ප්‍රදේශයේ ගොවීන් පවා පුදුමයට පත්ව සිටින බව ඔහු පෙන්වා දෙයි.

“කයිවාරු නොගසා, ක්‍රියාවෙන් පෙන්වන්න!” යැයි ඉන්ද්‍රානන්ද සිල්වා අමාත්‍යවරයාට අභියෝග කරයි. මෙය වැව් රක්ෂිත ඉඩම් ආක්‍රමණය සම්බන්ධයෙන් රජය ගන්නා ක්‍රියාමාර්ග පිළිබඳව සමාජයේ පවතින උණුසුම් කතිකාව තවදුරටත් අවුලුවාලන සිද්ධියක් බවට පත්ව තිබේ.

අවුරුදු ගණනාවක් පුරා මහජන පීඩනයට සහ වින්දිතයන්ගේ පවුල්වල, ආගමික නායකයින්ගේ සහ විරුද්ධ පක්ෂ මන්ත්‍රීවරුන්ගේ නැවත නැවතත් කළ ඉල්ලීම්වලට පසුව, 2019 පාස්කු ඉරිදා බෝම්බ ප්‍රහාරයට අදාළව රාජ්‍ය බුද්ධි සේවයේ (SIS) හිටපු ප්‍රධානී, ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන පොලිස් සේවයෙන් පහ කර තිබේ.

2019 වසරේ පාස්කු ඉරිදා ප්‍රහාරයට පෙර ඔහුගේ ක්‍රියාකලාපය සම්බන්ධයෙන් සිදුකළ විනය පරීක්ෂණයකින් පසුව ජාතික පොලිස් කොමිෂන් සභාව මෙම තීරණය ගෙන ඇති බව නිලධාරීහු සෙනසුරාදා (ජූලි 19) ප්‍රකාශ කළහ.

ප්‍රහාරය සිදුවන අවස්ථාවේ SIS ප්‍රධානියා ලෙස කටයුතු කළ ජයවර්ධන මහතා, රට පුරා පල්ලි සහ හෝටල් ඉලක්ක කර ගනිමින් එල්ල වූ මරාගෙන මැරෙන බෝම්බ ප්‍රහාර සම්බන්ධයෙන් ලැබී තිබූ ප්‍රධාන බුද්ධි තොරතුරු මත ක්‍රියා කිරීමට අපොහොසත් වී ඇති බවට සොයාගෙන තිබේ. මෙම ප්‍රහාරවලින් 260 කට අධික පිරිසක් මිය ගිය අතර සිය ගණනක් තුවාල ලැබූහ.

ජාතික පොලිස් කොමිෂන් සභාවේ ප්‍රකාශකයෙකු පැවසුවේ, “ජ්‍යෙෂ්ඨ නියෝජ්‍ය පොලිස්පති ජයවර්ධන මහතා සේවයෙන් පහ කිරීමට තීරණය කර ඇත්තේ විධිමත් විනය පරීක්ෂණයක සොයාගැනීම් මතයි” යනුවෙනි.

පසුගියදා පත්කළ ජනාධිපති කොමිෂන් සභා වාර්තාවකින් ද බුද්ධි තොරතුරු බෙදාගැනීමේ සහ ප්‍රතිචාර දැක්වීමේ බරපතල අඩුපාඩු පෙන්වා දෙමින් ජයවර්ධන ඇතුළු නිලධාරීන් කිහිප දෙනෙකුට එරෙහිව අපරාධමය සහ විනය ක්‍රියාමාර්ග නිර්දේශ කර තිබුණි.

පොලිස් කොමිෂන් සභාව මෙම කාරණය සම්බන්ධයෙන් ක්‍රියා කිරීමට අපොහොසත් වීම පිළිබඳව ශ්‍රේෂ්ඨාධිකරණය විවේචනය කිරීමෙන් පසු 2024 වසරේ දී ජයවර්ධන මහතා අනිවාර්ය නිවාඩු මත යොදවා තිබුණි. පසුව ඔහුට එරෙහිව චෝදනා පත්‍රයක් නිකුත් කිරීමෙන් පසුව විනය පරීක්ෂණය ආරම්භ විය.

ඔහුට එරෙහිව අපරාධ චෝදනා ගොනු කරන්නේ ද යන්න මෙතෙක් පැහැදිලි නැත. නීතිපති දෙපාර්තමේන්තුව මීට පෙර ප්‍රකාශ කර තිබුණේ ජයවර්ධනගේ භූමිකාව සම්බන්ධයෙන් අපරාධ පරීක්ෂණයක් තවමත් සමාලෝචනය වෙමින් පවතින බවයි.

දේශීය ඉස්ලාම් අන්තවාදීන් විසින් සිදුකරන ලද 2019 පාස්කු බෝම්බ ප්‍රහාර, ශ්‍රී ලංකා ඉතිහාසයේ සිදුවූ දරුණුතම ත්‍රස්තවාදී ප්‍රහාරවලින් එකක් ලෙස සැලකේ.

රජය පුළුල් පරාසයක ආයතනික ප්‍රතිසංස්කරණ සිදු කරමින් සිටින බව විදේශ කටයුතු අමාත්‍ය විජිත හේරත් පවසයි. අමාත්‍යවරයාගේ ප්‍රධානත්වයෙන් කොළඹ සැලැස්මේ 74 වන සංවත්සරය කොළඹදී පැවැති අවස්ථාවට එක්වෙමින් අමාත්‍යවරයා මේ බව සදහන් කලේය.

පොලිසිය, හමුදා සහ බුද්ධි සේවා අතර සම්බන්ධීකරණය වැඩි දියුණු කිරීම, නව නීති හඳුන්වා දීම, මත්ද්‍රව්‍ය ජාවාරමට සම්බන්ධ සංවිධාන අකර්මන්‍ය කිරීම සඳහා නවීන තාක්‍ෂණය උපයෝගී කර ගැනීම සහ බන්ධනාගාර පද්ධතිය තුළ දූෂණය තුරන් කිරීම සඳහා තීරණාත්මක පියවර ගණනාවක් මේ වන විට රජය ගනිමින් පවතින බව අමාත්‍යවරයා මෙහිදී අනාවරණය කළේය.

කොළඹ සැලැස්මේ කවුන්සිලයේ සභාපති, ඇමරිකානු තානාපති ජූලි චුන්ග්, කොළඹ සැලැස්මේ මහලේකම් අතිගරු ආචාර්ය බෙන්ජමින් පී. රේස් යන මහත්ම මහත්මීන්ද මේ අවස්ථාවට එක්වූහ.

බන්ධනාගාරවල රඳවා සිටින රැඳවියන් ගණන 33,095ක් දක්වා ඉහළ ගොස් ඇති බව බන්ධනාගාර ආරංචි පවසයි. මෙම ගණනය කිරීම ඉකුත් 17 වෙනිදා සිදුකර ඇති අතර සියළුම බන්ධනාගාර උපරිම සීමාව ඉක්මවා ඇති බව සඳහන්.

වැඩිම රැඳවියන් පිරිසක් රඳවා සිටින්නේ වැලිකඩ බන්ධනාගාරයේයි. එම ගණන 3,557ක් වේ.එහෙත් එම බන්ධනාගාරයේ රඳවා තැබිය හැකි රැඳවියන් ගණන 750ක් බවයි. රැඳවියන් 625ක් රඳවා තැබිය හැකි කොළඹ මැගසින් බන්ධනාගරයේ මේ වන විට රඳවා සිටින රැඳවියන් ගණන 2,985කි.

කොළඹ රිමාන්ඩ් බන්ධනාගාරයේ ද රැඳවියන් 2,426ක් රඳවා සිටින අතර, බන්ධනාගාර ආරංචි පැවසුවේ, එහෙත් එම බන්ධනාගාරයේ රැඳවිය හැකි රැඳවියන් ගණන 385ක් බවයි.

බන්ධනාගාර ආරංචි වැඩිදුරටත් පැවසුවේ , වැලිකඩ කාන්තා බන්ධනාගාරයේ රැඳවිය හැකි කාන්තා රැඳවියන් ගණන 220ක් වුවද මේ වන විට කාන්තා රැඳවියන් 561ක් එහි රඳවා සිටින බවයි .

වෛද්‍ය සැපයුම් ඒකකයේ වෙබ් අඩවිය අක්‍රීය තත්ත්වයට පත්ව ඇති නිසා ඖෂධයක් ගුණාත්මක භාවයෙන් අඩුවීමක් හෝ රෝහල්වල භාවිතයෙන් ඉවත් කිරීමක් සිදුවූයේ නම් එය දැන ගැනීමට මහජනතාවට ඇති නිදහස අහිමි වී ඇති බව සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානයේ සභාපති ​වෛද්‍ය චමල් සංජීව පවසයි.

හදිසි හෘදයාබාධ රෝගීන්ට ලබා දෙන ටෙනටෝෆේස් ඖෂධයද විවිධ සංකූලතා මතුවීම නිසා දිවයින පුරා රෝහල් කිහිපයකින් භාවිතයෙන් ඉවත් කොට ඇති බව කී වෛද්‍ය චමල් පවසන්නේ එවැනි තත්වයක් තුල සැපයුම් අංශයේ වෙබ් අඩවිය අක්‍රීය වීම සැක සහිත බවයි.