ශ්‍රී ලංකා ක්‍රිකට් කණ්ඩායම මේ මස අගදී සිම්බාබ්වේ සංචාරය ආරම්භ කිරීමට පෙර කොළඹ සිංහල ක්‍රීඩා සමාජ ක්රීඩාංගණයේ (එස්එස්සී) පැවැත්වෙන ශ්‍රී ලංකා ක්‍රිකට් ලීග් විස්සයි20 තරගාවලියේ අවසන් මහා තරගයට සුදුසුකම් ලැබීමට චරිත් අසලංකගේ ‘ග්‍රේස්’ පිල සමත් වූවේය. ඒ අනුව කමිඳු මෙන්ඩිස්ගේ ‘ග්‍රීන්ස්’ පිල සමඟ මේ 16 වැනිදා පැවැත්වෙන අවසන් මහා තරගයට ‘ග්‍රේස්’ පිල පිවිසේ.
ඊයේ පැවති තරගයේදී ‘ග්‍රේස්’ පිල වෙතින් කඩුලු 6කින් පරාජය වූ දුනිත් වෙල්ලාලගේ නායකත්වය දැරූ ‘බ්ලූස්’ කණ්ඩායම ඔවුන් සහභාගිවූ තරග හතරම පරාජයට පත්වීම හේතුවෙන් තරගාවලියෙන් ඉවතට විසිවී ගියේය.
‘ග්‍රේස්’ පිලේ නුවනිඳු ප්‍රනාන්දු මේ තරගාවලියේ සිය දෙවැනි අර්ධ ශතකය වාර්තා කරමින් පන්දු 34කදී හයේ පහරක් හා හතරේ පහර 4ක් සමඟ නොදැවී ලකුණු 50ක් ලබා තේරීම් කමිටුවේ අවධානයට ලක් විය. 2023දී එක්දින වරම් දිනා තරග 5කට ක්‍රීඩා කළ ඔහු, එම වසරේදීම විස්සයි20 තරගයකදී ශ්‍රී ලංකාව නියෝජනය කළ පසු ජාතික පිලෙන් ඉවත් කළ අතර, යළි මේ තරගාවලියේදී නුවනිඳු සුදුස්සකු බව තහවුරු කළේය.
නායක චරිත් අසලංක පන්දු 27කදී හයේ 3ක් හා හතරේ පහර 2ක් සමඟ ලකුණු 45ක් හා පළපුරුදු පිතිකරු දිනේෂ් චන්දිමාල් පන්දු 25කදී හයේ 2ක් හා හතරේ 5ක් සමඟ ලකුණු 44ක් ලබා ගැනීමත් කැපී පෙනිණි. කාසියේ වාසිය දිනාගත් ‘බ්ලූස්’ පිල මුලින් පන්දුවට පහරදී කඩුලු 5කට ලකුණු 178ක් ලබාගත් අතර, පිළිතුරු ඉනිම ක්‍රීඩා කළ ‘ග්‍රේස්’ පිල ඕවර 17.1කදී කඩුලු 4කට ලකුණු 179ක් ලබා ජය තහවුරු කර ගත්තේය.
‘බ්ලූස්’ පිලේ ආරම්භක පිතිකරුවන් වූ පැතුම් නිශ්ශංක හා වි‍ශේන් හැළඹ‍ගේ පළමු කඩුල්ලට පන්දු 34කදී ලකුණු 60ක සබඳතාවක් ගොඩනැඟූ අතර, පැතුම් පන්දු 15කදී හයේ 2ක් හා හතරේ 3ක් සමඟ ලකුණු 30ක්, හැළඹ‍ගේ පන්දු 25කදී හයේ 3ක් සමඟ ලකුණු 32ක් එක් කළහ. හයවැනි කඩුල්ලට පන්දු 39කදී ලකුණු 76ක සබඳතාවක් ගොඩනැඟූ දසුන් ශානක පන්දු 19කදී හයේ 2ක් හා හතරේ 3ක් සමඟ නොදැවී ලකුණු 35ක්, රවිඳු ප්‍රනාන්දු පන්දු 24කදී හයේ පහරක් හා හතරේ පහර 5ක් සමඟ නොදැවී ලකුණු 41ක් ඉනිමට එක් කළහ.
මූලික වටයේ අවසන් තරගයට චරිත් අසලංකගේ ‘ග්‍රේස්’ පිල හා කමිඳු මෙන්ඩිස්ගේ ‘ග්‍රීන්ස්’ පිල අද පස්වරු 1.30ට පිටියට පිවිසේ. එය අවසන් මහා තරගයට පිවිස සිටින එම කණ්ඩායම් දෙකට පෙර පුහුණු තරගයක් වැනිය.
‘බ්ලූස්’ පිල කඩුලු 6කට ලකුණු 178 (ඕවර 20) පැතුම් නිශ්ශංක 30, වි‍ශේන් හැළඹ‍ගේ 32, නිශාන් මධුෂ්ක 23, ධනංජය ද සිල්වා 1, අශේන් බණ්ඩාර 8, දසුන් ශානක නොදැවී 35, රවිඳු ප්‍රනාන්දු 41, අතිරේක 8 (ගරුක සංකෙත් 46/2, චරිත් අසලංක 8/1, විජේකාන්ත් වියෙස්කාන්ත් 15/1, සහන් ආරච්චිගේ 13/1)
‘ග්‍රේස්’ පිල කඩුලු 4ක් දැවී ලකුණු 179 (ඕවර 17.1) දිනේෂ් චන්දිමාල් 44, නිරෝෂන් දික්වැල්ල 21, ළහිරු උදාර 2, නුවනිඳු ප්‍රනාන්දු නොදැවී 50, චරිත් අසලංක 45, සහන් ආරච්චිගේ නොදැවී 2, අතිරේක 15 (ධනංජය ද සිල්වා 14/1, අසිත ප්‍රනාන්දු 28/1, මතීෂ පතිරණ 32/2)
