ශ්‍රී ලංකාවේ ද්විතීයික සෞඛ්‍යය සේවා ශක්තිමත් කිරීම සඳහා ආසියානු සංවර්ධන බැංකුව ඩොලර් මිලියන 106.9ක මූල්‍ය පහසුකමක් ලබාදීමට තීරණය කර තිබේ. මෙම ණය පහසුකමින් ඩොලර් මිලියන 100ක් ඒකාබද්ධ සෞඛ්‍යය සේවා සහ විශ්ව සෞඛ්‍ය ආවරණ සඳහා පාලනය ශක්තිමත් කිරීමේ වැඩසටහන යටතේ ණය මුදලක් ලෙස ලබාදෙයි. වසංගත වැළැක්වීම, සූදානම සහ ප්‍රතිචාර භාර අරමුදලෙන් ඩොලර් මිලියන 6.9ක මුදලක් ලබාදෙන්නේ ආපසු නොගෙවන ප්‍රදානයක් ලෙසිනි.

ශ්‍රී ලංකාවේ ද්විතීයික සුව කිරීමේ සත්කාර සේවා ශක්තිමත් කිරීම, බෝවන රෝග වැළැක්වීම සහ පාලනය වැඩිදියුණු කිරීම සහ සෞඛ්‍ය සේවා අංශයේ පාලනය සහ කළමනාකරණ ධාරිතාව වැඩිදියුණු කිරීම සඳහා ආසියානු සංවර්ධන බැංකුව (ADB) මෙම මුදල ලබා දෙයි. “සියලු දෙනාටම සෞඛ්‍යය සේවා සඳහා ප්‍රවේශය සහ ගුණාත්මකභාවය සහතික කිරීමේදී ශ්‍රී ලංකාව ආකර්ෂණීය ජයග්‍රහණ ලබා ඇත.” ADBහි ශ්‍රී ලංකා අධ්‍යක්ෂ ටකෆුමි කඩෝනෝ පැවසීය. “නමුත් ආයු කාලය ඉහළ යෑම සහ ජීවන රටා වෙනස් වීමත් සමඟ, වැඩිහිටි සෞඛ්‍යය සේවා අවශ්‍යතා සහ බෝ නොවන රෝග වැඩි වෙමින් පවතී. එවැනි ජනවිකාස සහ රෝග රටා වෙනස්කම් සඳහා වැඩිදියුණු කළ නඩු කළමනාකරණ ධාරිතාවක් සහිත රෝගී කේන්ද්‍රීය ප්‍රතිකාර සහ සත්කාර සේවා ඵලදායී ලෙස සැපයීම සඳහා වඩාත් ශක්තිමත් ද්විතීයික සත්කාරයක් අවශ්‍ය වේ යැයි ද ඔහු පැවසීය.

මෙම ප්‍රතිඵල පාදක ණය දීමේ වැඩසටහන, රෝහල් සංවර්ධනයට සහාය වීමෙන් රට පුරා ද්විතීයික සත්කාර සේවාවන්හි ගුණාත්මකභාවය, ධාරිතාව සහ කාර්යක්ෂමතාව වැඩිදියුණු කරනු ඇතැයි අපේක්ෂා කෙරේ.

ශුද්ධ වූ මුහම්මද් නබිතුමන්ගේ උපන්දිනය සමරමින් ලොව පුරා ඉස්ලාම් බැතිමතුන් විවිධ ආගමික වැඩසටහන්වලට එක්ව සිටියි.

ස්වකීය ජීවිතය පුරා මිනිසත් බව වෙනුවෙන් නබි තුමන් කළ කැපිකිරීම් අපිරිමිතය.

අනෝන්‍ය අවබෝධය සහෝදරත්වය එකිනෙකාට උපකාර කිරීම හා සාධාරණත්වය නබිතුමන්ගේ මූලික ඉගැන්වීම්වල හරය වේ.

මානව සමාජය ගුණ නැන බෙලෙන් හා අවිහිංසාවාදයෙන් පුරවාලිය යුතු බවයි එතුමන්ගේ දර්ශනය විය.

සමාජයේ ඇති නැති පරතරය සහ දුරස්බව මුලිනුපුටා දමා සමානාත්මතාව මිනිස් හදවත්හි රෝපණය කිරීමට අරගලයක් දියත් කළ නබිනායකතුමන්ගේ ආදර්ශය, සමාජමය අභියෝග ජය ගනිමින් සමනාත්මතාවෙන් සපිරි, නීතිගරුක සහ සාරධාර්මික රටක් ගොඩනැඟීමට දරන ප්‍රයත්නයේදී නොනිමෙන ආලෝකයක් සපයන බව ජනාධිපති අනුර කුමාර දිසානායක මහතා පවසයි.

ශුද්ධ වූ මුහම්මද් නබිතුමන්ගේ ජන්ම දිනය වෙනුවෙන් පණිවුඩයක් නිකුත් කරමින් ජනාධිපතිවරයා මේ බව සඳහන් කරයි.

මහජන ආරක්ෂක අමාත්‍යාංශයේ ලේකම්, විශ්‍රාමික ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්න මහතාට එරෙහිව ගල්කිස්ස මහේස්ත්‍රාත් අධිකරණයේ පැවති නඩු විභාගයක් තාවකාලිකව අත්හිටුවමින් අභියාචනාධිකරණය අද (4) අතුරු තහනම් නියෝගයක් නිකුත් කළේය.

2023 වසරේදී බීමත්ව රිය පදවා අනතුරක් වළක්වා ගැනීමට කටයුතු නොකිරීම ඇතුළු චෝදනා යටතේ සෙනෙවිරත්න මහතාට එරෙහිව මෙම නඩුව පවරා තිබුණි.

තමාට එරෙහි නඩුව වෙනත් අධිකරණයකට මාරු කරන ලෙස ඉල්ලා සෙනෙවිරත්න මහතා ඉදිරිපත් කළ පෙත්සමක් සලකා බැලීමෙන් අනතුරුව මෙම නියෝගය ලබා දී ඇත. මායාදුන්නේ කොරයා සහ මහේන් ගොපල්ලව යන විනිසුරු මඩුල්ල විසින් අභියාචනාධිකරණයේදී මෙම නියෝගය නිකුත් කරන ලදී.

ශ්‍රී ලංකාව සහ ඉතාලිය අතර දේශපාලන උපදේශන සමාරම්භක සැසිය සාර්ථකව අවසන් වූ බව විදේශ කටයුතු හා විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා අද (සැප්තැම්බර් 04) ප්‍රකාශ කළේය. ඉතාලියේ විදේශ කටයුතු සහ ජාත්‍යන්තර සහයෝගීතාව පිළිබඳ නියෝජ්‍ය අමාත්‍ය මරියා ට්‍රිපොඩි මහත්මියගේ සහභාගීත්වයෙන් මෙම සාකච්ඡා පැවැත්විණි.

නව ගිවිසුමකින් ද්විපාර්ශවික සබඳතා ශක්තිමත් කෙරේ
වසර හතළිහකට වඩා පැරණි මිත්‍රත්වය තවදුරටත් ශක්තිමත් කිරීමේ වැදගත් පියවරක් ලෙස, දෙරට අතර දේශපාලන උපදේශන යාන්ත්‍රණයක් පිහිටුවීම සඳහා අවබෝධතා ගිවිසුමකට (MoU) අත්සන් තැබූ බව නියෝජ්‍ය අමාත්‍යවරයා සඳහන් කළේය.

මෙම සාකච්ඡාවේදී දෙරට අතර වාණිජ හා ආයෝජන, සංචාරක කටයුතු, අධ්‍යාපන සහ සංස්කෘතික හුවමාරු, බලශක්ති, කෘෂිකාර්මික ක්ෂේත්‍ර, ඉතාලි රියදුරු බලපත්‍ර සම්බන්ධ එකඟතාව, ගුවන් ගමන් සේවා, නාවික කටයුතු සහ පාරම්පරික උරුම සංරක්ෂණය වැනි විවිධ ක්ෂේත්‍ර පිළිබඳව අවධානය යොමු වී ඇත.

මෙම සාකච්ඡා වටය ශ්‍රී ලංකාව සහ ඉතාලිය අතර හවුල්කාරිත්වය සඳහා නව පරිච්ඡේදයක් ආරම්භ කරන සාර්ථක පියවරක් වූ බව ද නියෝජ්‍ය අමාත්‍යවරයා වැඩිදුරටත් ප්‍රකාශ කළේය.

පාර්ලිමේන්තු මන්ත්‍රීවරුන් විසින් ‘වියත්පුර’ නිවාස ව්‍යාපෘතියෙන් නිවාස මිලදී ගැනීමේදී ලබා දී ඇති සහන ඉවත් කිරීමට කැබිනට් අනුමැතිය ලැබී ඇත.

2022-05-09 දින රට තුළ ඇති වූ කලබලකාරී කත්ත්වය මත නිවාස අහිමි වූ එවක පාර්ලිමේන්තු මන්ත්‍රීවරුන් සඳහා නාගරික සංවර්ධන අධිකාරීය මඟින් ඉදිකරන ලද වියත්පුර නිවාස සංකීර්ණයෙන් නිවාස ඒකක 101 ක් කුලී පදනම මත එක් වසරක කාලයක් සඳහා ලබා දීමට 2022-07-04 දින පැවැති අමාත්‍ය මණ්ඩල රැස්වීමේ දී අනුමැතිය ලබා දී ඇත.

ඉන් අනතුරුව, එම නිවාස සහනදායී ක්‍රම වේදයක් යටතේ මිල දී ගැනීමට ඔවුන්ට අවස්ථාව ලබා දෙන ලෙස එම පාර්ලිමේන්තු මන්ත්‍රීවරුන් විසින් ඉල්ලීම ඉදිරිපත් කර තිබේ. ඒ අනුව, රුපියල් මිලියන 15.5ක අවම වටිනාකමකට සහ රුපියල් මිලියන 22ක උපරිම වටිනාකමකට සාමාන්‍ය ජනතාව වෙත විකුණනු ලබන එම නිවාස ඒකකයක්, අවම වටිනාකම රුපියල් මිලියන 13.34 ක් ලෙස සහ උපරිම වටිනාකම රුපියල් මිලියන 18.21 ක් ලෙස අඩු කර සහනදායි ක්‍රමවේදය යටතේ පාර්ලිමෙන්තු මන්ත්‍රීවරුන් වෙත ලබා දීමටත්, විකුණුම් මිලෙන් 25% මුදලක් පළමුව අය කරගෙන ඉතිරි මුදල වසර 15ක කාලයක් තුළ වාර්ෂිකව 10%ක පොළී අනුපාතයක් යටතේ ඔවුන්ගෙන් අය කර ගැනීමටත් 2024 07- 15 දින අමාත්‍ය මණ්ඩල අනුමැතිය ලබා දී ඇත.

එම ක්‍රම වේදය යටතේ නිවාස මිල දී ගැනීම සඳහා හිටපු පාර්ලිමේන්තු මන්ත්‍රීවරුන් 29 දෙනෙකු 2024-12-31 දින වන විට විකුණුම් මිලෙන් 25% ක මුදලක් තැන්පත් කර තිබේ. එහෙත්, මෙම සහනදායී ක්‍රම වේදය හේතුවෙන් නාගරික සංවර්ධන අධිකාරියට රුපියල් මිලියන 92.126 ක පමණ පාඩුවක් විඳීමට සිදු වී ඇති අතර, දරන ලද පිරිවැය ආවරණය කර ගැනීමට නොහැකි වී ඇත.

එබැවින්, ඉහත පරිදි අනුමත කර ඇති සහනදායි ක්‍රමවේදය වහාම ක්‍රියාත්මක වන පරිදි අහෝසි කිරීමටත්, අදාළ පාර්ලිමේන්තු මන්ත්‍රීවරුන් 29 දෙනා එකඟ වන්නේ නම් සාමාන්‍ය මහජනතාවට එම නිවාස ලබා ගැනීම සඳහා වන ක්‍රමවේදය සහ එම මිල ගණන් යටතේ ඔවුන්ට ද නිවාස මිල දී ගැනීමට අවස්ථාව ලබා දීමටත් නාගරික සංවර්ධන, ඉදිකිරීම සහ නිවාස අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.

විදේශ කටයුතු අමාත්‍යාංශයේ අධ්‍යක්ෂ ජනරාල් සහ මාධ්‍ය ප්‍රකාශක තුෂාර රුද්‍රිගු සඳහන් කළේ, ශ්‍රී ලංකාවට සමුළුව සඳහා නිල ආරාධනාවක් නොලැබුණු හෙයින් සහභාගී නොවූ බවයි. ඔහු කියා සිටියේ, චීනය සහ ශ්‍රී ලංකාව අතර සබඳතාවල කිසිදු පළුදු වීමක් සිදු වී නොමැති බවත්, චීනය ඔවුන්ගේ උපායමාර්ගික සබඳතා යාවත්කාලීන කර ගැනීමට වෙනත් රටවලට ආරාධනා කරන්නට ඇති බවත්ය. ජනාධිපතිවරයා චීනයේ සංචාරය කළ අතර, ඉදිරියේදී අගමැතිනිය ද චීනයේ සංචාරයකට සූදානම් වන බව ඔහු වැඩිදුරටත් කියා සිටියේය.

කැබිනට් ප්‍රකාශක අමාත්‍ය නලින්ද ජයතිස්ස පෙන්වා දුන්නේ, ජනාධිපතිවරයාට වෙනත් විදෙස් සංචාර කිහිපයකට සහභාගී වීමට ඇති කාර්ය බහුලත්වය හේතුවෙන් මෙම සමුළුව මඟ හැරෙන්නට ඇති බවයි. කෙසේ වෙතත්, විදේශ කටයුතු අමාත්‍යාංශය විසින් ඉදිරිපත් කළ හේතුව ගැන විමසූ විට, තමන් ඒ පිළිබඳව නොදන්නා බව කැබිනට් ප්‍රකාශකවරයා සඳහන් කළේය.

සමුළුවට සහභාගී නොවීම පිළිබඳව විවිධ සමාජ මාධ්‍ය සහ දේශපාලන විශ්ලේෂකයන් අතර විවිධ අදහස් මතුවී තිබේ. සමහර ෆේස්බුක් පරිශීලකයන් එය ‘හොඳ තීරණයක්’ ලෙස හැඳින්වූ අතර, එවැනි සමුළුවකට සහභාගී වීමෙන් ඇමරිකාව වැනි රටවල් සමඟ සබඳතා පළුදු විය හැකි බවට අදහස් පළ විය.

කෙසේ වෙතත්, ජ්‍යෙෂ්ඨ රාජ්‍ය තාන්ත්‍රික නිලධාරියෙකු වන ආචාර්ය දයාන් ජයතිලක පවසන්නේ, ශ්‍රී ලංකාවට ලැබෙන සෑම අවස්ථාවකදීම වෙනත් රටවල් සමඟ සමීප සබඳතා ගොඩනගා ගත යුතු බවයි. ඉන්දියාව සහ පාකිස්තානය වැනි රටවල් පවා මෙම සමුළුවට සහභාගී වූ බැවින් ශ්‍රී ලංකාව ද නියෝජනයක් යැවිය යුතුව තිබුණ බව ඔහු අවධාරණය කළේය.

මේ අතර, විදේශ කටයුතු අමාත්‍ය විජිත හේරත්, ෂැංහයි සමුළුවේදී චීන ජනාධිපති ෂී ජින්පිං විසින් ඉදිරිපත් කරන ලද ‘ගෝලීය සංවර්ධන, ආරක්ෂාව සහ ශිෂ්ටාචාර මුලපිරීම්’ ධනාත්මකව සටහන් කර ගනිමින් X (ට්විටර්) පණිවිඩයක් පළ කර තිබුණි.

Shanghai Five ලෙස 1996 දී ආරම්භ වූ මෙම සංවිධානය, 2001 දී ෂැංහයි සහයෝගිතා සංවිධානය (SCO) බවට පත්විය. එය චීනය, රුසියාව, ඉන්දියාව, පාකිස්තානය ඇතුළු රටවල් 10 කින් සමන්විත ලොව විශාලතම කලාපීය සංවිධානයකි. ශ්‍රී ලංකාව එහි සංවාද හවුල්කාර රටවල් 14 අතරට අයත් වේ.

රජරට විශ්වවිද්‍යාල ශිෂ්‍ය සංගමය, ශ්‍රී ලංකා විශ්වවිද්‍යාල ක්‍රීඩා උළෙල (SLUG) සම්බන්ධයෙන් විශ්වවිද්‍යාල මට්ටමෙන් දැඩි විරෝධය පළ කරමින් මෙවර උළෙලට සහභාගී නොවන බව නිල වශයෙන් ප්‍රකාශ කර ඇත.

2025 සැප්තැම්බර් 04 වන දින නිකුත් කළ නිල ප්‍රකාශනයේදී, ශිෂ්‍ය සංගමය පෙන්වා දුන්නේ, රටේ දේශපාලන හා ආර්ථික තත්ත්වය මත ජනතාව දැඩි වශයෙන් අර්බුද‍යකට පත් වී සිටින අතර, අධ්‍යාපන ක්ෂේත්‍රය ද බරපතල බලපෑම් අත්විඳිමින් සිටින බවය.

ඉන් අතරතුර, කාන්තාවන්ට සහ දුප්පත් ජනතාවට දැඩි බලපෑම් සිදුකරන IMF මගින් ගෙන එන ආර්ථික වැඩසටහන් මගින් රටේ අනාගතය තවදුරටත් අවදානමට පත්ව ඇති බවත් සංගමය සඳහන් කර ඇත.

මේ ආර්ථික අර්බුදය තුළ විශ්වවිද්‍යාල ශිෂ්‍යයන් පවා පාඩු විඳින අතර, රජය උදාසීනව ක්‍රියා කරමින් සිසුන්ගේ මූලික අයිතිවාසිකම් කඩාකප්පල් කරන බවත් ප්‍රකාශනයේ දැක්වේ.

එසේම, SLUG ක්‍රීඩා උළෙල මෙවන් තත්ත්වයකදී පවත්වා ගැනීම අසාධාරණ බව පෙන්වා දෙමින්, සමාජය හා විශ්වවිද්‍යාල සිසුන්ගේ අයිතිවාසිකම් ආරක්ෂා කිරීම සඳහා රජරට විශ්වවිද්‍යාල ශිෂ්‍ය සංගමය මෙම විරෝධය පළ කළේ ය.

”ක්‍රීඩා උළෙල පැවැත්වෙන රජරට විශ්වවිද්‍යාල භූමියට පවතින මජර, දූෂිත දේශපාලන ක්‍රමය නියෝජනය කරන පාර්ශවය පැමිණීමෙන් රජරට විශ්වවිද්‍යාල මහා ශිෂ්‍ය සංගමය දැඩි පිළිකුලෙන් යුතුව ප්‍රතික්ෂේප කරන අතර ඊට තරයේ විරුද්ධ වන්නෙමු” ලෙස එම ලිපියේ අවසානයේ රජරට විශ්ව විද්‍යාලයේ මහා ශිෂ්‍ය සංගමයේ සභාපති යොහාන් කවිශ්ක විසින් සදහන් කර ඇත.